كەنيانىڭ ورتالىعىنداعى سامبۋرۋ وكرۋگىندە ورنالاسقان ولولوكۆە تاۋىندا تىكۇشاق اپاتقا ۇشىراپ، بورتىنداعى التى ادامنىڭ بارلىعى قازا تاپتى. بۇل تۋرالى اۋە اپاتتارىن تەرگەۋ قىزمەتىنىڭ وكىلدەرى BBC-گە حابارلادى.
اۋە اپاتتارىن تەرگەۋ دەپارتامەنتى قازا تاپقانداردىڭ جەكە باسى ءالى انىقتالماعانىن مالىمدەدى. جەرگىلىكتى ب ا ق دەرەكتەرىنە سۇيەنسەك، تىكۇشاقتا تۋريستەر بولعان.
كەنيا ازاماتتىق اۆياسيا اكىمشىلىگى (KCAA) اپات جەرگىلىكتى ۋاقىت بويىنشا شامامەن 09:13-تە (06:13 GMT) بولعانىن حابارلادى. تىكۇشاق لوسايباداعى جابايى تابيعات قورىعىنان ەۆاسو نيرو وزەنىنە قاراي اۋە ساياحاتىن جاساپ بارا جاتقان. بۇل وزەن بىرنەشە ۇلتتىق قورىقتاردىڭ بويىمەن اعىپ وتەدى.
الەۋمەتتىك جەلىدە تاراعان سۋرەتتە ولولوكۆە تاۋىنداعى اپات ورنىنان ءتۇتىن كورىنەدى. كەنيا قىزىل كرەستى BBC-گە اپات ورنىنا ءالى جەتۋ مۇمكىن ەمەس ەكەنىن، الايدا جاعدايدى باعالاۋ ءۇشىن دروندار قولدانىلىپ جاتقانىن ايتتى.
KCAA مالىمەتىنشە، اپاتقا ۇشىراعان تىكۇشاق — Eurocopter EC130 B4 ۇلگىسى. اكىمشىلىك جەدەل جۇمىستاردى ۇيلەستىرىپ جاتىر. كولىك مينيسترلىگى مەن اۋە اپاتتارىن تەرگەۋ دەپارتامەنتى اپاتتىڭ ءمان-جايىن انىقتاۋ بويىنشا تەرگەۋ جۇرگىزەتىنىن مالىمدەدى.