حورمۋز بەن باب ال-ماندەب بۇعازدارى ارقىلى كەمە ءجۇرىسىنىڭ توقتاۋى تەڭىز ساقتاندىرۋ باعاسىن كۇرت قىمباتتاتتى. الەمدىك ەكونوميكا ءۇشىن ماڭىزدى ەكى سۋ جولى ءقازىر سوعىس الاڭىنا اينالدى، دەپ حابارلايدى infohub.kz.
يەمەندىك حۋسيلەر (يران قولدايتىن توپ) وسى اپتا باسىندا قىزىل تەڭىز بەن ءۇندى مۇحيتىن جالعايتىن باب ال-ماندەب بۇعازىندا ساۋد ارابياسى پورتتارى مەن كەمەلەرىنە بلوكادا جاريالادى. بۇل – اقش پەن ءيزرايلدىڭ يرانعا قارسى سوعىسىنا بايلانىستى حورمۋز بۇعازىنداعى ۇزىلىستەردىڭ ۇستىنە كەلگەن جاعداي. تەگەران كەمەلەردىڭ بۇعازدان ءوتۋ ءۇشىن رۇقسات الۋى كەرەكتىگىن مالىمدەسە، اقش يرانعا قاتىستى كەمەلەرگە تەڭىز بلوكاداسىن ەنگىزدى.
حورمۋز بۇعازىنداعى جاعدايعا كەلسەك، يران يسلام رەۆوليۋسياسى كۇزەت كورپۋسى (يركك) بەيسەنبىدە ءبىر تانكەردىڭ جارىلىستان ورتەنگەنىن حابارلادى. يركك ءۇش كەمەنىڭ اقش بۇيرىعىمەن ارەكەت ەتكەنىن ايتىپ، «حورمۋز بۇعازى ءبىزدىڭ باقىلاۋىمىزدا، مۇناي تاسيتىن كەمەلەردىڭ كىرۋىنە نەمەسە شىعۋىنا تىيىم سالىندى» دەپ ەسكەرتتى. سوعىسقا دەيىن بۇعازدان كۇنىنە 120-140 كەمە وتەتىن بولسا، ءقازىر بۇل كورسەتكىش نە بارى ەكى تانكەرگە دەيىن تومەندەگەن. S&P Global مالىمەتىنشە، سەيسەنبىدە بۇعازدان 10 كەمە وتكەن (دۇيسەنبىدە 16 بولعان).
ساقتاندىرۋ باعاسى دا ايتارلىقتاي ءوستى. S&P Global ەسەبىندە بۇرىن كەمە قۇنىنىڭ 1-3 پايىزىن قۇراعان سوعىس تاۋەكەلىن ساقتاندىرۋ ەندى 7،5-10 پايىزعا جەتكەن. پارسى شىعاناعىنان قىتايعا مۇناي تاسىمالداۋ قۇنى ءبىر مەتريكالىق توننا ءۇشىن 77،96 دوللار بولىپ، بەس جىلدىق ورتاشا كورسەتكىشتەن ءتورت ەسە جوعارى. وسى باعامەن 270 مىڭ توننالىق تانكەردى ساقتاندىرۋ شامامەن 21 ميلليون دوللار تۇرادى.
باب ال-ماندەب بۇعازىندا حۋسيلەر ساۋد ارابياسىنا قارسى تەڭىز بلوكاداسىن جاريالاپ، ەكى ساۋد ارابيالىق مۇناي تانكەرىنە شابۋىل جاسادى. ساۋد ارابياسىنىڭ SPA اگەنتتىگى Encelia تانكەرىنىڭ زاقىمدانعانىن راستادى. S&P ەسەبى بويىنشا، بۇعازداعى كەمە قاتىناسى سەيسەنبىدە 30 پايىزعا ازايىپ، 41 كەمەدەن 29-عا تۇسكەن. باب ال-ماندەب ارقىلى وتەتىن كەمەلەر ءۇشىن ساقتاندىرۋ سىيلىقاقىسى 0،5 پايىزدى قۇراسا، باتىس ساۋد ارابياسى ماڭىنداعى قىزىل تەڭىزدە بۇل كورسەتكىش 0،1 پايىز.