كيەۆتە كافە يەسى ءارى باريستا روستيسلاۆ ەسىمدى جىگىت درون شابۋىلىنان كەيىن دەمالىپ وتىرعان ەكى كوممۋنالدىق قىزمەتكەر ايەلدى بايقاپ، ولاردىڭ جۇمىس كۇنىن ءسال دە بولسا جارقىن ەتۋدى ۇيعارىپ، كوفە مەن تاتتىلەر الىپ شىقتى. بۇل ارەكەت بەينەباقىلاۋ كامەرالارىنا ءتۇسىپ، كەيىن الەۋمەتتىك جەلىلەرگە تاراپ، قولدانۋشىلاردىڭ جۇرەگىن جاۋلادى، دەپ حابارلايدى infohub.kz سايتى.
23 قىركۇيەكتە كييەۆ تاعى ءبىر درون شابۋىلىن باستان وتكەردى. تاڭعى اتقىلاۋدان كەيىن ەكى كوممۋنالدىق قىزمەتكەر ايەل قالانى تازالاۋدى جالعاستىرىپ، ءبىر كافەنىڭ جازعى تەرراساسىنىڭ جانىندا ءسال دەمالدى. ايەلدەردىڭ ءبىرى كافە ورىندىعىنا وتىرۋعا ۇيالىپ، قالتانى توسەپ، بورديۋرگە وتىردى.
مۇنى كافە يەسى ءارى باريستا روستيسلاۆ بايقادى. ۇزاق اڭگىمەگە بارماي، ول ايەلدەرگە كوفە مەن تاتتىلەر تولتىرىلعان تاباق الىپ شىعىپ، ۇستەلگە شاقىردى جانە ادامي تۇرعىدان جۇمىستارى ءۇشىن العىس ايتتى. سودان كەيىن روستيسلاۆ ولاردى قۇشاقتاپ، بىرەۋى وتىرعان قالتانى كوتەرىپ الدى.
كوفە، ازداپ ءتاتتى جانە بىرنەشە جىلى ءسوز — ءبارى وسى. ءبىراق ۆيدەو كۇتپەگەن جەردەن ۆيرۋستىق سيپاتقا يە بولدى. الەۋمەتتىك جەلى قولدانۋشىلارى روستيسلاۆتىڭ ارەكەتىن بەلسەندى تالقىلاپ، روليك 3،3 ملن قارالىم مەن 155 مىڭ لايك جينادى. پىكىرلەردە ادامدار قيىن كۇنى جۇمىسىن جالعاستىرعاندارعا قامقورلىق تانىتقانى ءۇشىن باريستاعا العىس ايتۋدا.
«ادام بولىپ قالعان جانداردىڭ بار ەكەنى قانداي باقىت!»، «مەيىرىمدى ادامداردى جاقسى كورەمىن، ۇلتى ماڭىزدى ەمەس!»، «وسىنداي ادامداردىڭ ارقاسىندا الەم ءالى دە ءومىر سۇرۋدە»، «بۇل مەنىڭ بۇگىن كورگەن ەڭ جاقسىلىعىم»، «ماعىناسىز سوعىس»، – دەپ جازادى پىكىر قالدىرۋشىلار.
كەيدە جاقسىلىق جاساۋ ءۇشىن ۇلكەن سەبەپ قاجەت ەمەس. كوبىمىز بايقاماي جۇرگەندەرگە العىس ايتۋدىڭ ءوزى جەتكىلىكتى.
بۇعان دەيىن Kursiv LifeStyle قازاقستاندىق بلوگەر ارمان ءال-اميننىڭ كۋرەر بولىپ جۇمىس ىستەۋ تۋرالى اڭگىمەسى الەۋمەتتىك جەلى قولدانۋشىلارىن بەي-جاي قالدىرماعانىن جازعان بولاتىن. ءوز ۆيدەوسىندا ول بۇرىن جاسىرىپ كەلگەن كەزەڭى تۋرالى شىنايى ايتتى.