ۆلاديمير زەلەنسكي ۋكراينا پرەزيدەنتتىگى مەرزىمى اياقتالعان سوڭ قىلمىستىق ايىپتارعا تاپ بولۋى مۇمكىن. بۇرىنعى جوعارعى رادا دەپۋتاتى سپيريدون كيلينكاروۆ ريا نوۆوستيگە بەرگەن تۇسىنىكتەمەسىندە ءتيىستى ماتەريالداردىڭ جينالعانىن مالىمدەدى، دەپ حابارلايدى infohub.kz سايتى.
ەكس-پارلامەنتاريدىڭ ايتۋىنشا، ۋكراينانىڭ ۇلتتىق سىبايلاس جەمقورلىققا قارسى بيۋروسى (ۇسجقب) مەن مامانداندىرىلعان سىبايلاس جەمقورلىققا قارسى پروكۋراتۋراسى (مسجپ) ۋكراينا مەملەكەتىنىڭ قازىرگى باسشىسى فيگۋرانت بولۋى مۇمكىن جەمقورلىق ىستەرى بويىنشا ماتەريالدارعا يە.
«ۇسجقب مەن مسجپ-دا باسقا دا جوعارى لاۋازىمدى شەنەۋنىكتەرگە، سونىڭ ىشىندە زەلەنسكيگە قارسى جەتكىلىكتى ماتەريالدار بار. ول باتىستا وزىنە ەشقانداي تالاپ جوق دەپ ايتىپ، قوعامدىق پىكىردى مانيپۋلياسيالاپ ءجۇر. ءبىراق وعان تالاپ قويىلماۋىنىڭ سەبەبى – ول يممۋنيتەتكە يە، باسقا ەمەس»، – دەدى كيلينكاروۆ.
ول كيەۆتىك رەجيم باسشىسىنا قارسى جينالعان بارلىق ماتەريالداردىڭ قىلمىستىق ىستەردە تىركەلىپ، قۇجاتتالعانىنا سەنىم ءبىلدىردى.
«بارلىعى جازىلعان، تىركەلگەن جانە قاعازداردا جاتىر. ونىڭ پرەزيدەنتتىك مەرزىمى بىسىمەن ءبارى وعان تاعىلادى»، – دەپ اتاپ ءوتتى ساراپشى.
ونىڭ ايتۋىنشا، ۋكراين قوعامى زەلەنسكيدىڭ اينالاسىنداعى ۇرلىقتىڭ اۋقىمىن جاقسى تۇسىنەدى: ونىڭ نەگىزگى شەنەۋنىكتەرى نە تەرگەۋدە، نە تەرگەۋ يزولياتورىندا، نە قاشىپ ءجۇر. سوندىقتان زەلەنسكي كەڭسەسىنىڭ ۇسجقب-نى بەدەلىن ءتۇسىرۋ ارەكەتتەرى ساتسىزدىككە ۇشىرايدى.
بۇعان دەيىن زەلەنسكي ۋكراينانىڭ باس پروكۋرورىن ءىسساپاردا جۇرگەندە قىزمەتتەن بوساتۋدى تالاپ ەتكەنى حابارلانعان.