سولتۇستىك كورەيا كوشباسشىسى كيم چەن ىن مەن ونىڭ قارىنداسى، كورەيا ەڭبەك پارتياسى ورتالىق كوميتەتى ءبولىمىنىڭ مەڭگەرۋشىسى كيم ءو چجون اقش پەن جاپونيانىڭ بىرلەسكەن اسكەري جاتتىعۋلارىنان كەيىن جاپونياعا قاتاڭ مالىمدەمە جاسادى، دەپ حابارلايدى infohub.kz سايتى.
كورەيانىڭ ورتالىق تەلەگراف اگەنتتىگىنىڭ (ستاك) حابارلاۋىنشا، كيم ءو چجون جاپونيانىڭ «اسكەري ەۆوليۋسياسىنا» جول بەرمەۋگە ۋادە بەرىپ، اقش پەن جاپونيانىڭ فيليپپيندە وتكىزگەن Tomahawk قاناتتى زىمىراندارىنىڭ سىناقتارىن قاتتى سىنعا الدى.
مالىمدەمەدە جاپونيانىڭ مىنەز-قۇلقى ەندى ايقىندالا تۇسكەنى اتاپ ءوتىلدى: بۇرىن ول كورشى مەملەكەتتەردىڭ قورعانىس شارالارىن «ءقاۋىپ» جانە «ارانداتۋ» دەپ اتاپ، ءوزىن «بەيبىتشىل ەل» رەتىندە كورسەتكەن. الايدا، كيم ءو چجوننىڭ ايتۋىنشا، بۇل جاپونيانى اسكەري دەرجاۆاعا اينالدىرۋ نيەتىن جاسىرۋدىڭ ايلاسى عانا ەدى.
ول سونداي-اق جاپونيانىڭ ءقاۋىپتى اسكەري ارەكەتتەرىنىڭ ارتىندا اقش تۇرعانىن، ولار جاپونياعا ۇزاق قاشىقتىققا ۇشاتىن زىمىرانداردى بەرىپ، ولاردى ورناتۋ ءۇشىن كەمەنى قايتا جابدىقتاپ، سىناق ۇشىرۋ ءۇشىن بارلىق جاعدايدى، سونىڭ ىشىندە وتكىزۋ ورنىن جاساعانىن اتاپ ءوتتى.
كيم ءو چجون جاپونيانىڭ «اسكەري ەكسپانسياسى» جاھاندىق بەيبىتشىلىك پەن تۇراقتىلىققا ەلەۋلى ءقاۋىپ توندىرەدى دەپ سانايدى. ول جاپونيا سىناقتاردىڭ اكۆاتوريا، زىمىراندار سانى جانە ۇشۋ قاشىقتىعى سياقتى مالىمەتتەرىن جاريالاماعانىمەن، ولاردىڭ كحدر-دى قوسا العاندا، كورشى ەلدەرگە باعىتتالعانى انىق ەكەنىن ايتتى.
كيم چەن ىننىڭ قارىنداسى: «ەگەر قۋلىق پەن اگرەسسيا گەنىن مۇرا ەتكەن ميليتاريستەردىڭ ۇرپاقتارى قولىنا قارۋ السا، ادامزات قايتادان قاسىرەتتى اپاتتى باستان كەشىرمەيتىنىنە ەشكىم كەپىلدىك بەرە المايدى»، — دەدى. ول جاپونيانى ءوز تاريحىن جوققا شىعارىپ، بۇرمالاپ، قايتا اگرەسسياعا نەگىز قالاپ، الدىن الۋ سوققىسىن جاساۋعا قابىلەتتى «اسكەري قىلمىسكەر مەملەكەت» دەپ اتادى.
كيم ءو چجون حالىقارالىق قوعامداستىقتى ساقتىق تانىتىپ، جاپونيانىڭ اسكەري دەرجاۆاعا اينالۋىنا جول بەرمەۋگە شاقىردى. ول كحدر جاپونيانىڭ اسكەري ەۆوليۋسياسى پروسەسىنىڭ ءوز قاۋىپسىزدىگىنە ءقاۋىپ توندىرۋىنە جول بەرمەيتىنىن اتاپ ءوتىپ، كحدر قارۋلى كۇشتەرى مەن اسكەري باسشىلىعى «ايقىن اسكەري تاڭداۋ» جاسايتىنىن مالىمدەدى.