كيپر ايماعىنداعى پاروم اپاتىنان كەيىن تاعى ەكى ادامنىڭ ءمايىتى تابىلدى. بۇل تۋرالى سولتۇستىك كيپر پرەمەر-مينيسترى يۋنال يۋستەل مالىمدەدى، دەپ حابارلايدى infohub.kz سايتى.
اپات سالدارىنان قازا تاپقاندار سانى 12-گە جەتتى، تاعى 16 ادام ىزدەستىرىلۋدە. يۋستەلدىڭ ايتۋىنشا، تابىلعان مايىتتەر ەكى ايەلگە تيەسىلى. بۇعان دەيىن ءبىر ەر ادام مەن ءبىر ايەلدىڭ ءمايىتى تابىلعان بولاتىن.
Filo Jet پارومى جەكسەنبى كۇنى تۇستەن كەيىن سولتۇستىك كيپردەگى گيرنە پورتىنان تۇركيانىڭ تاسۋدجۋ قالاسىنا بەت العان كەزدە اۋدارىلىپ، سۋعا باتقان ەدى. بورتتا 267 جولاۋشى مەن ەكيپاج مۇشەلەرى بولعان.
ىزدەستىرۋ جۇمىستارىنا تۇركيانىڭ ەكى اسكەري-تەڭىز كەمەسى قوسىلدى. ولار سۋ استىنداعى اپپاراتتاردىڭ كومەگىمەن تەڭىز تۇبىندەگى 550 مەتر تەرەڭدىكتە جاتقان پاروم قالدىقتارىن زەرتتەپ جاتىر.
يۋستەل جۋرناليستەرگە بەرگەن سۇحباتىندا: "ءبىزدىڭ 16 ادامدى ىزدەۋ وپەراسيالارىمىز تۇركيا رەسپۋبليكاسىنىڭ قولداۋىمەن جانە بارلىق ءتيىستى بولىمشەلەردىڭ قاتىسۋىمەن تاۋلىك بويى ۇزدىكسىز جالعاسۋدا. ولار بۇل جۇمىستاردى وتە اۋىر جاعدايدا اتقارىپ جاتىر"، - دەدى.
ىزدەستىرۋ جۇمىستارى كيپردىڭ سولتۇستىك جاعالاۋىنان شامامەن 7،5 شاقىرىم قاشىقتىقتا جۇرگىزىلۋدە.
امان قالعانداردىڭ ايتۋىنشا، كەڭ كورپۋستى كاتاماران تومەنگى پالۋبالاردان قاتتى دىبىستار ەستىلگەننەن كەيىن ءتىزىلىپ، سۋ قابىلداي باستاعان. بۇل بورتتاعىلار اراسىندا دۇربەلەڭ تۋدىرعان. سۋ كىرە باستاعاندا جولاۋشىلار وتىرعان ايماقتا ادامدار قامالىپ قالعان.
پاروم يەسى Filo Denizcilik كومپانياسىنىڭ سەگىز ەكيپاج مۇشەسى مەن ءبىر ديرەكتورى قاماۋعا الىندى. تاعى بەس ادام، ونىڭ ىشىندە Filo Denizcilik قىزمەتكەرلەرى مەن پورت اكىمشىلىگىنىڭ وكىلدەرى تەرگەۋگە تارتىلدى.
ەسكە سالايىق، كيپر 1974 جىلى ەتنيكالىق نەگىزدە بولىنگەن ەدى. 1983 جىلى سولتۇستىك كيپر تاۋەلسىزدىگىن جاريالادى. الايدا ارالدىڭ سولتۇستىگىن تەك تۇركيا عانا مويىندايدى، وندا 35 مىڭنان استام تۇرىك اسكەرى ورنالاسقان.