سولتۇستىك كيپر جاعالاۋىندا جولاۋشىلار پارومى اپاتقا ۇشىراپ، كەم دەگەندە جەتى ادام قازا تاپتى، تاعى 23 ادام حابار-وشارسىز كەتتى، دەپ حابارلايدى infohub.kz سايتى.
بورتىندا 259 جولاۋشىسى جانە سەگىز ەكيپاج مۇشەسى بولعان FILOJET كەمەسى كيرەنيا پورتىنان شىعىپ، مەرسين پروۆينسياسىنداعى تۇرىك پورتى تاشۋدجۋعا بەت العان. گاۆاننان شىققاننان كەيىن كوپ ۇزاماي پاروم بەلگىسىز سەبەپپەن سۋعا تولا باستاعان، ول جاعالاۋدان شامامەن ءتورت تەڭىز ءميلى قاشىقتىقتا بولعان، سودان كەيىن اۋدارىلعان.
جاريالانعان كادرلاردا قۇتقارۋ كەۋدەشەلەرىن كيگەن جولاۋشىلاردىڭ اۋدارىلعان كەمەنىڭ كورپۋسىندا تۇرىپ، كومەك كۇتىپ تۇرعانى كورىنەدى. كيپر تۇرىكتەرىنىڭ كوشباسشىسى تۋفان ەرحيۋرمان: «ءبىز 237 ادامدى تىرىدەي تاپتىق. جەتى ادام قازا تاپتى، تاعى 23 ادامدى ىزدەۋدى جالعاستىرۋدامىز»، — دەپ مالىمدەدى.
قازاقستان سىرتقى ىستەر مينيسترلىگىندە الدىن الا دەرەكتەر بويىنشا اپاتقا ۇشىراعان كەمە بورتىندا ەل ازاماتتارى بولماعانىن حابارلادى. ق ر ءسىم ءباسپاسوز قىزمەتى: «الدىن الا دەرەكتەر بويىنشا، كيپر ارالى جاعالاۋىندا اپاتقا ۇشىراعان كەمە بورتىندا قازاقستان رەسپۋبليكاسىنىڭ ازاماتتارى بولعان جوق. قازاقستاندىق ديپلوماتتار اقپاراتتى تەكسەرۋدى جالعاستىرۋدا»، — دەپ مالىمدەدى.
قۇتقارۋ وپەراسياسىنا جاعالاۋ كۇزەتىنىڭ توعىز كەمەسى، ازاماتتىق جولاۋشىلار كەمەسى جانە ەكى تىكۇشاق جۇمىلدىرىلعان. ماماندار سونداي-اق پاروم ىشىندە قالۋى مۇمكىن ادامداردى ىزدەۋ ءۇشىن قوسىمشا جابدىقتى پايدالانۋدا. الدىڭعى كۇنى كيپردە داۋىلدى اۋا رايى بايقالعان، الايدا ەرحيۋرماننىڭ ايتۋىنشا، پاروم تەڭىزگە شىققان كەزدە اۋا رايى جاعدايى جۇزۋگە قولايلى دەپ سانالعان. اپاتتىڭ ناقتى سەبەبىن انىقتاۋ كەرەك.