كيپردەگى ءقوناقۇي تەرەزەسىنەن قۇلاپ، ۇلى قازا بولعان اكە كىناسىن مويىندادى. بۇل تۋرالى infohub.kz سايتى حابارلايدى.
فوستەرگە بالاسىنىڭ جەرلەۋ راسىمىنە قاتىسۋ ءۇشىن ۇلىبريتانياعا بارۋعا رۇقسات بەرىلگەن. الايدا وتكەن اپتادا ول كىناسىن مويىنداۋ تۋرالى سوت تىڭداۋىنا قاتىسۋ ءۇشىن كيپرگە قايتا ورالۋعا مىندەتتەلدى.
ونىڭ ادۆوكاتى الەكساندروس الەكساندرۋ سوتتان شەتەلگە شىعۋ شەكتەۋىن الىپ تاستاۋدى سۇرايتىنىن مالىمدەدى. بۇل ونىڭ كليەنتىنە كەلەسى سوت وتىرىسىنا دەيىن ايەلى مەن قىزىنىڭ قاسىندا بولۋ ءۇشىن ۇلىبريتانياعا قايتا ورالۋعا مۇمكىندىك بەرەدى.
پافوس اۋداندىق سوتىنا شىلدە ايىندا بالا اكەسى ونى بەلىنەن ۇستاپ، ەكى جاققا تەربەپ تۇرعان كەزدە اشىق تەرەزەدەن قۇلاپ كەتكەنى حابارلانعان.
الەكساندرۋدىڭ ايتۋىنشا، فوستەر ۇزاق سوت پروسەسىنەن اۋلاق بولۋ جانە وتباسىنىڭ بالاسىنىڭ قازاسىن سوت زالىندا قايتا باستان كەشپەۋى ءۇشىن كىناسىن مويىنداۋدى شەشكەن.
ادۆوكات سەيسەنبىدەگى سوت وتىرىسىنان كەيىن Associated Press اگەنتتىگىنە ۇزاق پروسەسس ەر ادامنىڭ «وسى قايعىلى وقيعانىڭ تاعى دا قۇربانى بولۋىنا» اكەلەتىنىن ايتتى.
«ول ءۇشىن ەڭ ماڭىزدىسى — وتباسىنا ورالۋ»، — دەدى ول.
ايىپ بويىنشا ەڭ جوعارى جازا ءتورت جىل باس بوستاندىعىنان ايىرۋ بولىپ تابىلادى. ءبىراق الەكساندرۋ سوت بۇعان دەيىن ايىپتالۋشىلار ايىپپۇل تولەگەن نەمەسە شارتتى تۇردەگى جازا العان ىستەردى ەسكەرۋى كەرەك ەكەنىن ايتتى.
الەكساندرۋ BBC-گە بەرگەن مالىمدەمەسىندە: «بۇل — زيان كەلتىرۋ نيەتىنسىز بولعان نازاردىڭ ءبىر ساتتىك السىرەۋى، الايدا ول ەڭ اۋىر جانە ەلەستەتۋگە كەلمەيتىن سالدارعا اكەپ سوقتى»، — دەدى.
«ءبىز ءقازىر جازا تاعايىنداۋ الدىندا سوتقا ءتيىستى جەڭىلدەتەتىن دالەلدەر مەن ءمان-جايلاردى ۇسىنامىز»، — دەپ قوستى ول.
ادۆوكاتتىڭ ايتۋىنشا، «قورقىنىشتى وقيعالاردان» كەيىن وتباسى «ەلەستەتۋگە كەلمەيتىن قايعىنى» باستان كەشىردى جانە وسى ۋاقىتتا جەكە ءومىرىنىڭ قۇپيالىلىعىن ساقتاۋدى سۇرادى.