جاپونيادا ءوتىپ جاتقان ازيا ويىندارىنىڭ قىلىش سايىسىندا 19 جاستاعى قازاقستاندىق شپاگاشى كيريلل پروحودوۆ كۇمىس جۇلدەگەر اتاندى. فينالدا ول توكيو-2020 مەن پاريج-2024 وليمپيادا ويىندارىنىڭ چەمپيونى، الەمنىڭ ەكى دۇركىن چەمپيونى جاپونيالىق كوكي كانوعا 13:15 ەسەبىمەن جول بەردى، دەپ حابارلايدى infohub.kz سايتى.
پروحودوۆ فينالعا سەنىمدى جەتتى. جارتىلاي فينالدا ول گونكونگتان كەلگەن فون حوي سۋندى 15:13 ەسەبىمەن ۇتتى. شيرەك فينالدا ازيانىڭ ەكى دۇركىن چەمپيونى قىتايلىق مينحاو لاندى 15:7 ەسەبىمەن جەڭدى. پلەي-وففتىڭ ەكىنشى اينالىمىندا تايبەيلىك يۋلي گاستون دجيللەموتتى 15:14 ەسەبىمەن ءوتتى، ال شىعۋ سايىستارىنىڭ باسىندا ابدۋلراحمان الدجادرانى 15:2 ەسەبىمەن تىزە بۇكتىردى. توپتىق تۋرنيردە 19 جاستاعى قىلىششى التى سايىستىڭ بەسەۋىندە جەڭىسكە جەتتى.
قازاقستاندىق شپاگاشىلاردىڭ كوشباسشىسى رۋسلان كۋربانوۆ، سونداي-اق سابلياشىلار ايگەرىم سارىباي مەن اناستاسيا گۋليك جۇلدەلى سايىستارعا جەتە المادى.
ازيادالاردىڭ قىلىش سايىستارىندا قازاقستان ءۇش التىن، ءتورت كۇمىس جانە 13 قولا مەدال جەڭىپ الدى. كۇنى كەشە 14ء-شى قولانى سابلياشى ارتەم ساركيسيان يەلەندى. پروحودوۆتىڭ مەدالى — بەسىنشى كۇمىس.
ازيا ويىندارىنىڭ چەمپيونى اتاعىن شپاگاشىلار قۇراماسى ەكى رەت جەڭىپ العان (1994، 2002). ءدال وسى قارۋ تۇرىنەن دميتري الەكسانين ازيادا-2018-دە توپ جاردى.
XX جازعى ازيا ويىندارى رەسمي تۇردە 19 قىركۇيەكتە اشىلدى جانە 4 قازاندا مارەسىنە جەتەدى. 45 ەلدىڭ سپورتشىلارى قاتىساتىن سايىستاردا 460 مەدال جيىنتىعى ساراپقا سالىنۋدا. ازيادا-2026-دا قازاقستان قۇراماسىنىڭ ساپىندا 35 سپورت تۇرىنەن 558 سپورتشى سىنعا تۇسۋدە.
ويىنداردىڭ ءبىرىنشى كۇنى قازاقستاندىقتار ءتورت التىن مەدال جەڭىپ الدى. ويىندار چەمپيونى اتانعاندار: ۆەلوشاباندوزدار ريناتا سۋلتانوۆا مەن الەكسەي لۋسەنكو، سونداي-اق كاراتەشىلەر جولامان بيگابىل مەن سوفيا بەرۋلسەۆا. قۇراما قورجىنىنا بەسىنشى التىندى مما سايىسكەرى ەركىنعالي بۇركىتالين سالدى. التىنشىسىن — ارالاس جەكپە-جەكتەگى كوماندالاسى قادىربەك شىنبايەۆ. كۇنى كەشە لۋسەنكو اي-2026-نىڭ ەكى دۇركىن چەمپيونى اتاندى. سەگىزىنشى جوعارى سىناقتاعى مەدالدى بۇگىن ەرلەر اراسىنداعى جۇپتىق ەسۋ سايىسىندا ۆلاديسلاۆ ياكوۆليەۆ پەن يۆان چەرنۋحين جەڭىپ الدى.
ويىنداردىڭ ءتورت كۇنىنەن كەيىن قازاقستان بەيرەسمي مەدال ەسەبىندە ءتورتىنشى ورىندا تۇردى.