«تاقتار ويىنى» جۇلدىزى كيت حارينگتون HBO-دىڭ «گارري پوتتەر» سەريالىنىڭ ەكىنشى ماۋسىمىنىڭ اكتەرلىك قۇرامىنا قوسىلدى. دجون سنوۋ رولىمەن تانىمال اكتەر پروفەسسور زلاتوپۋست لوكونس ءرولىن سومدايدى، دەپ حابارلايدى infohub.kz سايتى.
حارينگتون باستاپقىدا بۇل رولگە بەكىتىلگەن، ءبىراق كەستەدەگى قايشىلىقتارعا بايلانىستى جوبادان كەتكەن نيكولاس حولتتى الماستىرادى: لوكونس قاتىساتىن كورىنىستەردىڭ ءتۇسىرىلىمى اۋىستىرىلدى، ال اكتەر جاڭا كەستەگە بەيىمدەلە المادى.
حارينگتون ءۇشىن بۇل كەيىپكەر جاڭا ەمەس: وتكەن جىلى ول «گارري پوتتەردىڭ» اۋديونۇسقاسىندا لوكونستى دىبىستاعان بولاتىن. ەندى وعان قاراڭعى ونەردەن قورعاۋ ءپانىنىڭ وزىنە سەنىمدى ءمۇعالىمىن ەكراندا سومداۋ كەرەك.
لوكونس دجوان روۋلينگتىڭ ەكىنشى كىتابى — «گارري پوتتەر جانە قۇپيا بولمەدە» پايدا بولادى. 2002 جىلعى فيلمدە ونى كەننەت برانا ويناعان. كەيىپكەر داڭققا قۇمارلىعىمەن، ءوزىن-وزى ماقتاۋىمەن جانە ءوز ەرلىكتەرى تۋرالى اسەرلى اڭگىمەلەرىمەن تانىمال.
ەكىنشى ماۋسىمنىڭ ءتۇسىرىلىمى كۇزدە باستالادى. ءبىرىنشى ماۋسىمنىڭ تۇساۋكەسەرى روجدەستۆوعا جوسپارلانعان، باستى رولدەردى دومينيك ماكلافلين، الاستەر ستوۋت جانە ارابەللا ستەنتون سومدايدى.
حارينگتون ءۇشىن بۇل HBO-داعى ءۇشىنشى جوبا. ول «تاقتار ويىنىنىڭ» بارلىق سەگىز ماۋسىمىندا دجون سنوۋ ءرولىن وينادى، ءقازىر «يندۋستريا» سەريالىندا ءتۇسىپ ءجۇر.
بۇعان دەيىن «گارري پوتتەر» سەريالىنىڭ تۇسىرىلىمىندە سەۆەرۋس سنەيپتى وينايتىن اكتەر پااپا ەسسەدۋعا ءقاۋىپ تونگەندىكتەن، قاۋىپسىزدىك شارالارى كۇشەيتىلگەنى حابارلانعان بولاتىن.