بيىلعى كۇزدە استانا مەن شانحاي اراسىندا تىكەلەي اۋە رەيستەرى ىسكە قوسىلۋى مۇمكىن، دەپ حابارلايدى inbusiness.kz سايتى ق ر كولىك مينيسترلىگىنە سىلتەمە جاساپ.
ازاماتتىق اۆياسيا كوميتەتىنىڭ ءتورايىمى سالتانات تومپيەۆا China Eastern Airlines اۋەكومپانياسىنىڭ ماركەتينگ جانە ساتۋ جونىندەگى اعا ۆيسە-پرەزيدەنتى دجين چەنچۋمەن كەزدەستى. كەزدەسۋ قورىتىندىسى بويىنشا قىتايلىق اۋەتاسىمالداۋشىنىڭ استانا – شانحاي جاڭا حالىقارالىق باعىتىن اشۋعا مۇددەلىلىگى راستالدى.
China Eastern Airlines وكىلدەرى باعىتتىڭ جوعارى كوممەرسيالىق الەۋەتىن اتاپ ءوتىپ، بارلىق قاجەتتى دايىندىق شارالارى اياقتالعاننان كەيىن بيىلعى كۇزدەن باستاپ رەيستەردى ورىنداۋعا دايىن ەكەندەرىن جەتكىزدى.
العاشقى كەزەڭدە رەيستەر اپتاسىنا ءۇش رەت ورىندالىپ، كەيىن كۇندەلىكتى قاتىناسقا دەيىن جيىلىگىن ارتتىرۋ جوسپارلانعان.
كەزدەسۋ بارىسىندا تاراپتار قازاقستان مەن جۇڭگو اراسىنداعى اۋە قاتىناسىن ودان ءارى دامىتۋ، باعىتتار جەلىسىن كەڭەيتۋ جانە رەيستەر سانىن ارتتىرۋ ماسەلەلەرىن تالقىلادى.