قازاقستاندا «جىلدىڭ 10 وقىرمانى» رەسپۋبليكالىق كىتاپ مارافونى باستالدى. جەڭىمپازداردىڭ ءارقايسىسى 10 ملن تەڭگەدەن الادى، دەپ حابارلايدى infohub.kz سايتى.
قازاقستان رەسپۋبليكاسى مادەنيەت جانە اقپارات مينيسترلىگىنىڭ مالىمەتىنشە، قاتىسۋشىلار ءوز ساناتىنا ارنالعان تىزىمدەگى 15 شىعارمانى وقىپ، سودان كەيىن ىرىكتەۋدەن ءوتۋى كەرەك. جەڭىمپازداردىڭ ەسىمى 2027 جىلدىڭ كوكتەمىندە بەلگىلى بولادى.
جوباعا قاتىسۋ تەگىن. ۇيىمداستىرۋشىلار 345 شىعارمادان تۇراتىن ءتىزىم دايىنداپ، قاتىسۋشىلاردى جەتى ساناتقا ءبولدى: وقۋشىلار، كوللەدج ستۋدەنتتەرى، جوعارى وقۋ ورىندارىنىڭ ستۋدەنتتەرى، پەداگوگتەر، ءۇش ۇرپاقتان تۇراتىن وتباسىلىق اۋلەتتەر، مەملەكەتتىك قىزمەتشىلەر جانە وزگە دە ازاماتتار. ساياسي جانە زياتكەرلىك قاۋىم وكىلدەرى ءۇشىن «Parasat» اتتى جەكە باعىت قاراستىرىلعان.
مارافون 2027 جىلدىڭ ناۋرىزىنا دەيىن جالعاسىپ، 195 اۋدان مەن 87 قالانى قامتيدى. ايماقتىق ىرىكتەۋدەن كەيىن شامامەن 4 مىڭ جۇلدەگەر انىقتالادى، ولاردىڭ ىشىنەن 20 وڭىردەن 200 ادام رەسپۋبليكالىق فينالعا شىعادى.
فيناليستەرگە بەتپە-بەت اڭگىمەلەسۋ مەن كوپشىلىك الدىندا سويلەۋ سىناعى كۇتىپ تۇر. ولار وقىعان كىتاپتارىن بىلەتىنىن جانە ادەبيەتتى تالداي الاتىنىن كورسەتۋى ءتيىس. كوميسسيا ون جەڭىمپازدى تاڭداپ، ءارقايسىسىنا «جىل وقىرمانى» اتاعىن بەرىپ، 10 ملن تەڭگە كولەمىندە سىياقى تاپسىرادى.
ماراپاتتاۋ ءراسىمى 2027 جىلدىڭ 23 ساۋىرىندە، ۇلتتىق كىتاپ كۇنى وتەدى. وتكەن جىلى مارافون ءۇش وڭىردە پيلوتتىق فورماتتا وتكىزىلگەن. مينيسترلىكتىڭ دەرەگىنشە، وعان سول كەزدە شامامەن 190 مىڭ ادام قاتىسقان.
بۇعان دەيىن «كۋرسيۆ» قازاقستاندىقتار كىتاپ وقىپ، 600 مىڭ تەڭگە تابا الاتىنىن جازعان ەدى.