كورەي حالىق دەموكراتيالىق رەسپۋبليكاسىنىڭ سىرتقى ىستەر مينيسترلىگى مەموراندۋم دايىنداپ، امەريكا قۇراما شتاتتارىنىڭ ارەكەتتەرىنەن «قورقىنىشتى يادرولىق اپات» بولۋى مۇمكىن دەپ ەسكەرتتى، دەپ حابارلايدى infohub.kz سايتى.
پحەنيان اقش-تىڭ يادرولىق كۇشىن ۇلعايتۋى، سونداي-اق يادرولىق قارۋ مەن تەحنولوگيالاردى تاراتۋ جونىندەگى ارەكەتتەرى حالىقارالىق يادرولىق ءتارتىپتى تولىق كۇيرەۋگە اكەلدى دەپ سەنەدى.
«ەگەر اقش-تىڭ يادرولىق تەحنولوگيالاردى تىك جانە كولدەنەڭ تاراتۋ جونىندەگى ارەكەتتەرى ءارى قاراي جازاسىز قالسا، "پاندورا جاشىگى" تولىق اشىلىپ، ادامزاتقا قورقىنىشتى يادرولىق اپات تونەتىن بولادى»، — دەلىنگەن قۇجاتتا.
كحدر ۆاشينگتوندى يادرولىق قارۋسىزدانۋ جونىندەگى مىندەتتەمەلەردەن باس تارتتى، ءوزىنىڭ يادرولىق الەۋەتىن ۇلعايتتى جانە وداقتاستارىنا يادرولىق تەحنولوگيالاردى تاراتتى دەپ ايىپتادى.
«اقش-تىڭ AUKUS-قا جاپونيا، وڭتۇستىك كورەيا، جاڭا زەلانديا جانە كانادا سياقتى وداقتاستارىن تارتىپ، ونى اتاۋى جاعىنان دا، مازمۇنى جاعىنان دا الەمدەگى ەڭ ۇلكەن اتوم سۇڭگۋىر قايىقتار اليانسىنا اينالدىرۋعا تىرىسىپ جاتقانىن دا نازاردان تىس قالدىرۋعا بولمايدى»، — دەدى ەلدىڭ سىرتقى ساياسي ۆەدومستۆوسى.
پحەنياننىڭ پىكىرىنشە، اقش-تىڭ وڭتۇستىك كورەيانىڭ اتوم سۇڭگۋىر قايىقتارىنا يە بولۋىن ماقۇلداۋى يادرولىق تەحنولوگيالاردىڭ «AUKUS ۇلگىسىمەن» تاراتىلعانىنىڭ تاعى ءبىر دالەلى جانە ازيا-تىنىق مۇحيتى ايماعىنداعى اسكەري-ساياسي جاعدايعا تۇراقسىزدىقتىڭ جاڭا فاكتورىن قوسادى.
«اقش-تىڭ يادرولىق كۇشىن جەدەل ۇلعايتۋى مەن يادرولىق تەحنولوگيالاردى اشىق تاراتۋ ارەكەتتەرىنەن حالىقارالىق يادرولىق ءتارتىپ تولىق كۇيرەۋگە ۇشىراعان قازىرگى گەوساياسي جاعداي ءبىزدىڭ مەملەكەتتەن الەمدەگى بەيبىتشىلىكتى قورعاۋدا جانە جاھاندىق ستراتەگيالىق تۇراقتىلىقتى قامتاماسىز ەتۋدە نەعۇرلىم بەلسەندى ءرول اتقارۋدى تالاپ ەتەدى»، — دەدى كحدر.
ايتا كەتەيىك، جاقىندا كحدر قورعانىس مينيسترلىگى اقش پەن وڭتۇستىك كورەيانىڭ قاۋىپ-قاتەرلەرىنە جاۋاپ رەتىندە «مەملەكەتتىك يادرولىق قارۋلى كۇشتەر ماسەلەلەرى جونىندەگى ساياسات تۋرالى زاڭنىڭ بابىن» ىسكە قوسۋعا قورقىتتى. وسىدان كەيىن كحدر-دىڭ زىمىران اسكەرلەرى جاڭا تيپتەگى قارۋدى سىناقتان وتكىزدى — سولتۇستىك كورەيا كوشباسشىسى كيم چەن ىن جاڭالىقتى «جەڭىلمەيتىن كۇش» دەپ اتادى.
ال وتكەن اپتادا كحدر اقش، جاپونيا جانە وڭتۇستىك كورەيانىڭ ەلدى دەنۋكلەاريزاسيالاۋ تۋرالى مالىمدەمەسىن ايىپتاپ، ونىڭ يادرولىق مارتەبەسى مىزعىماس كۇيدە قالاتىنىن ەسكەرتتى.