قازاقستانداعى ايگىلى قىزعىلت كول كوبەيتۇز ەرەكشە قورعالاتىن تابيعي اۋماق مارتەبەسىن الادى. مۇنداي تاپسىرمانى قازاقستان پرەزيدەنتى قاسىم-جومارت توقايەۆ بەردى، دەپ حابارلايدى infohub.kz.
اقمولا وبلىسى اكىمدىگىنىڭ مالىمەتىنشە، كولدىڭ بىرەگەي ەكوجۇيەسىن قورعاۋ ءۇشىن بۇيراتاۋ مەملەكەتتىك ۇلتتىق تابيعي پاركىنىڭ شەكاراسى كەڭەيتىلىپ، كوبەيتۇز اكۆاتورياسى ونىڭ قۇرامىنا ەنگىزىلەدى.
استانادان 160 شاقىرىم جەردە ورنالاسقان سۋ ايدىنى ەلدەگى ەڭ فوتوگەنيكالىق تابيعي نىسانداردىڭ ءبىرى سانالادى جانە جىل سايىن مىڭداعان تۋريستەردى تارتادى. قوناقتار سانىنىڭ ارتۋى ءتيىستى ينفراقۇرىلىمدى قاجەت ەتەدى. سوندىقتان كولگە قورعاۋ مارتەبەسىن بەرۋمەن قاتار، اكىمدىك جاعالاۋ ايماعىن اباتتاندىرۋعا كىرىسەدى: مۇندا باقىلاۋ الاڭى مەن اۆتوتۇراق جابدىقتالادى، وسىلايشا ايماق تۇرعىندارى مەن قوناقتارى نازىك ەكوجۇيەگە زيان كەلتىرمەي، تابيعات قۇبىلىسىن باقىلاپ، سۋرەتكە تۇسىرە الادى.
سونىمەن قاتار، اقمولا وبلىسى تابيعي رەسۋرستار جانە تابيعات پايدالانۋدى رەتتەۋ باسقارماسى سۋدىڭ گيدروحيميالىق قاسيەتتەرىن زەرتتەدى. تالداۋ ءبىرقاتار زاتتار بويىنشا شەكتى رۇقسات ەتىلگەن شوعىرلانۋدىڭ اسىپ كەتكەنىن كورسەتتى — امموني ازوتى، اممياك، حلوريدتەر، مىشياك، سۋلفاتتار جانە باسقالار. وسى دەرەكتەردى ەسكەرە وتىرىپ، كولدە شومىلۋعا جانە جاعاسىنان تۇز جيناۋعا قاتاڭ تىيىم سالىنادى.
اباتتاندىرۋ جۇمىستارى جۇرگىزىلەتىن كەزەڭدە كولگە كىرۋ شەكتەلەدى: جاعالاۋ سىزىعىنا جاقىنداۋعا جانە ۇسىنىلعان ايماقتان تىس جەردە بولۋعا جول بەرىلمەيدى. كىرەبەرىستە تاۋلىك بويى بەكەتتەر ۇيىمداستىرىلىپ، پاترۋلدەۋدى پوليسيا ۋاكىلەتتى ورگاندارمەن بىرگە جۇزەگە اسىرادى.
اكىمدىك ايماق تۇرعىندارى مەن قوناقتارىن بەلگىلەنگەن تالاپتاردى جانە تابيعات قورعاۋ زاڭناماسىن ساقتاۋعا، قورشاعان ورتاعا ۇقىپتى قاراۋعا شاقىردى، بىرەگەي تابيعي نىساندى بولاشاق ۇرپاققا ساقتاپ قالۋ ءۇشىن.
وتكەن جىلى تامىزدا كوبەيتۇز قىزعىلت كولىندە جاپپاي رەيدتەر جۇرگىزىلگەن ەدى — تۋريستەر كامەرالاردان جاسىرىنباي، اشىق تۇردە تۇزدى قازىپ الىپ، كەتىپ جاتقان.