اقمولا وبلىسىنداعى بىرەگەي كول – كوبەيتۇز استانادان 160 شاقىرىم جەردە ورنالاسقان. پرەزيدەنت تاپسىرماسىنا سايكەس، ول ەرەكشە قورعالاتىن تابيعي اۋماق مارتەبەسىن الادى. بۇل تۋرالى infohub.kz سايتى حابارلايدى.
ول ءۇشىن بۇيراتاۋ ۇلتتىق پاركىنىڭ شەكاراسى كەڭەيتىلەدى – ونىڭ قۇرامىنا كول ايدىنى كىرەدى. بيلىك وسىلايشا كولدىڭ بىرەگەي ەكوجۇيەسىن ساقتاپ قالۋدى كوزدەيدى.
سونىمەن قاتار، كول ماڭىندا اباتتاندىرۋ جۇمىستارى باستالادى. جاعالاۋدا تۇراق الاڭى مەن باقىلاۋ الاڭى جابدىقتالادى. بۇل تۋريستەردىڭ كولدى تاماشالاۋىنا مۇمكىندىك بەرىپ، جاعالاۋ سىزىعىن بۇلدىرمەۋگە كومەكتەسەدى. جۇمىس كەزىندە كولگە كىرۋ شەكتەلەدى.
«جاعالاۋ سىزىعىنا جاقىنداۋعا جانە ۇسىنىلعان ايماقتان تىس جەردە بولۋعا جول بەرىلمەيدى. كولگە كىرەبەرىستەردە تاۋلىك بويى بەكەتتەر ۇيىمداستىرىلادى، اۋماقتى پاترۋلدەۋدى پوليسيا ۋاكىلەتتى ورگاندارمەن بىرگە جۇزەگە اسىرادى»، – دەلىنگەن وبلىس اكىمدىگىنىڭ حابارلاماسىندا.
بۇعان دەيىن ماماندار كول سۋىن زەرتتەگەن. تالداۋ ناتيجەسىندە اممياك، امموني ازوتى، حلوريدتەر، مىشياك جانە سۋلفاتتار سياقتى ءبىرقاتار زاتتاردىڭ رۇقسات ەتىلگەن شەگىنەن اسقانى انىقتالعان. سوندىقتان كوبەيتۇز كولىندە شومىلۋعا جانە ونىڭ جاعالاۋىنان تۇز جيناۋعا تىيىم سالىنعان.
ەسكە سالايىق، 2025 جىلى جازدا بيلىك كوبەيتۇز كولىندە باقىلاۋدى كۇشەيتكەن بولاتىن. سەبەبى تۋريستەر تۇز جيناپ، ونى ينتەرنەتتە ساتىپ جۇرگەن.