كوفە ءىشۋ — كوفەيندى دە، كوفەينسىز دە — ىشەك ميكروبيوتاسىنىڭ قۇرامىن وزگەرتىپ، ىشەك پەن مي اراسىنداعى بايلانىسقا اسەر ەتەدى، كوڭىل كۇي مەن تانىمدىق قىزمەتتى جاقسارتادى. وسىنداي تۇجىرىمعا كورك ۋنيۆەرسيتەتتىك كوللەدجى جانىنداعى APC Microbiome Ireland زەرتتەۋ ورتالىعىنىڭ عالىمدارى كەلدى. ولار سۋسىننىڭ «ىشەك — مي» وسىنە اسەرىن زەرتتەدى، دەپ حابارلايدى infohub.kz سايتى.
زەرتتەۋ Nature Communications جۋرنالىندا كوفە تۋرالى عىلىمي اقپارات ينستيتۋتىنىڭ (ISIC) قولداۋىمەن جاريالاندى. وعان كۇنىنە 3–5 كەسە كوفە ىشەتىن 31 كوفە سۇيەر قاۋىم وكىلى جانە بۇل سۋسىندى مۇلدە ىشپەيتىن 31 ادام قاتىستى.
تاجىريبە بارىسىندا كوفە سۇيەرلەر الدىمەن ەكى اپتا بويى ودان باس تارتتى — بۇل ولاردىڭ ىشەگىندەگى مەتابوليتتەر بەيىنىندە ايتارلىقتاي وزگەرىستەر تۋعىزدى. كەيىن سۋسىندى تاعام راسيونىنا سوقىر تۇردە قايتاردى: ءبىر توپقا قاراپايىم كوفە، ەكىنشىسىنە كوفەينسىز كوفە بەرىلدى. قابىلداۋ قايتا باستالعان سوڭ ەكى توپ تا سترەسس، دەپرەسسيا جانە يمپۋلسيۆتىلىك دەڭگەيىنىڭ تومەندەگەنىن ايتتى.
كوفەنى ۇنەمى ىشەتىندەردە قىشقىل بولىنۋگە جانە ءوت وندىرىلۋگە قاتىساتىن، جاعىمدى ەموسيالارمەن بايلانىستى Eggertella sp، Cryptobacterium curtum جانە Firmicutes باكتەريالارىنىڭ جوعارى دەڭگەيى دە تىركەلدى.
زەرتتەۋ سۋسىننىڭ ءار ءتۇرىنىڭ اسەرىندە ايىرماشىلىق بار ەكەنىن انىقتادى: كوفەينسىز كوفە وقۋ مەن جادى كورسەتكىشتەرىن جاقسارتتى، بۇل پوليفەنولدار مەن انتيوكسيدانتتاردىڭ اسەرىمەن بايلانىستىرىلادى، ال قاراپايىم كوفە ۇرەي دەڭگەيىن تومەندەتىپ، زەيىندى ارتتىرىپ، قابىنۋ ءقاۋپىن ازايتتى.
پروفەسسور دجون كرايان كوفەنى ىشەك دەنساۋلىعى مەن ەموسيونالدىق ءال-اۋقاتقا تەك كوفەين ەسەبىنەن عانا ەمەس، اسەر ەتەتىن كۇردەلى ديەتالىق فاكتور رەتىندە قاراستىرۋ كەرەكتىگىن اتاپ ءوتتى.