كوكشەتاۋدا ۇلەسكەرلەرگە قاتىستى جانجال ءورشىپ تۇر: 18 ادام تۇرعىن ءۇي قۇرىلىسىنا 120 ملن تەڭگەدەن استام قاراجات سالعان، ءبىراق پاتەرلەرىن الا الماعان، دەپ حابارلايدى infohub.kz.
ءتورت جىل ىشىندە قۇرىلىس سالۋشى جوسپارلانعان ون ەكى قاباتتىڭ تەك بىرەۋىن عانا تۇرعىزعان. ۇلەسكەرلەردىڭ ايتۋىنشا، 2022 جىلى شارتقا قول قويار الدىندا ولارعا تارتىمدى جوبا كورسەتىلىپ، جەكە باسپانا تۋرالى ارماندارىنىڭ جاقىن ارادا ورىندالاتىنىنا سەندىرگەن.
«2023 جىلى مەن اقشامدى الۋعا كەلدىم، بەرمەدى: „وسى ءۇيدىڭ ىشىنەن قويما بولمەسىن بەرەمىز“ دەدى. ءبىر جىلدان كەيىن — بىرنەشە قادا سوقتى. تاعى ءبىر جىلدان سوڭ اقشا سۇراپ كەلسەم، „كۇتە تۇرىڭىز. ايىپپۇلدى شارشى مەترمەن بەرەمىز“ دەيدى. تۇسىنەسىز بە؟ مىنە، 2022 جىلدان بەرى 2026 جىلعا دەيىن ەشتەڭە الا المادىم!» — دەپ نارازىلىق ءبىلدىردى جۇماتاي تاجىبايەۆ.
ۇلەسكەرلەر اقپارات جيناي باستاعاندا، قۇرىلتايشى كومپانيا بانكروتتىق ءراسىمىن باستاعانىن انىقتاعان. «ءبىز اكىمدىكتەن دە، پروكۋراتۋرادان دا وسى ماسەلەنى شەشۋدى سۇرادىق. قىلمىستىق ءىس قوزعاۋ ءۇشىن ءوتىنىش بەردىك، ويتكەنى بۇل الاياقتىققا ۇقسايدى. اقشانى جيناپ الىپ، قۇرىلىس توقتاپ تۇر. ەشقانداي ءىز تابا الماي وتىرمىز»، — دەدى سارا اقتاەۆا.
قۇرىلىس سالۋشىنىڭ زاڭگەرى كومپانيانىڭ ءوزى جاعدايدىڭ كەپىلىنە اينالعانىن ايتادى. ونىڭ سوزىنشە، 2021 جىلى فيرما ۇلەسكەرلەردىڭ قاراجاتىن تارتۋعا قۇقىلى بولعان، بانك-وپەراتورمەن كەلىسىم جاساپ، جەڭىلدىكتى باعدارلاما بويىنشا تۇرعىن ءۇي ساتپاق بولعان. الايدا جاعداي وزگەرىپ، ءقازىر كومپانيا جەكە ينۆەستورلاردى ىزدەستىرۋدە. «نەگىزگى سەبەپ — „تۇرعىن ءۇي قۇرىلىس جيناق بانكى“ جەڭىلدىكتى نەسيەلەندىرۋدى توقتاتتى، سوعان بايلانىستى رۇقسات كەرى قايتارىلدى. تيىسىنشە، قۇرىلىس توقتاتىلدى. وتكەن جىلدىڭ قىركۇيەگىندە الماتى قالاسىنان ءبىر ينۆەستيسيالىق كومپانيامەن كەلىسىمشارت جاسادىق. ءبىراق ازىرگە بەلگىسىز سەبەپتەرمەن قارجى قۇيىلماي وتىر»، — دەپ ءتۇسىندىردى زاڭگەر يلدار حيسمۋتدينوۆ.
اكىمدىكتە ۇلەسكەرلەر ماسەلەسىن شەشۋ باسىم باعىت ەكەنىن ايتتى. ءوز تاراپىنان ولار كومەكتەسۋگە تىرىسىپ وتىر — ينۆەستور تابىلعان سىڭايلى. «ولاردان ۇلەسكەرلەر سانى مەن جوبا قۇنى تۋرالى مالىمەت الدىق. ءقازىر ولار جوبانى تولىعىمەن اياقتاۋ ءۇشىن ىشكى ەسەپ جۇرگىزىپ جاتىر. قالا اكىمدىگى تاراپىنان قولداۋ كورسەتىلەدى — جەر تەلىمدەرى مەن تەحنيكالىق جاعدايلار جاسالادى»، — دەدى كوكشەتاۋ قالالىق جەر قاتىناستارى، ساۋلەت جانە قالا قۇرىلىسى ءبولىمىنىڭ باسشىسى. الايدا ناقتى مەرزىمدەردى ۆەدومستۆو اتامادى.