كوكشەتاۋدا مامىر ايىندا قالا اۋلالارىنىڭ بىرىندە بولعان ولىممەن اياقتالعان جول-كولىك وقيعاسى بويىنشا ەكىنشى قىلمىستىق ءىس توقتاتىلدى. اۆتوكولىك ايەل ادامدى قاعىپ، باسىپ كەتكەن، دەپ حابارلايدى infohub.kz.
23 ماۋسىمدا كوكشەتاۋ قالالىق سوتى ايىپتالۋشى ايەلگە قاتىستى ءىستى قارادى. وعان قىلمىستىق كودەكستىڭ 345-بابى 3-بولىگى (جول ءجۇرىسى قاعيدالارىن بۇزۋ، ابايسىزدا ادام ولىمىنە اكەپ سوققان) بويىنشا ايىپ تاعىلعان. انىقتالعانداي، 2026 جىلى مامىردا ايىپتالۋشى جۇرگىزۋشى كۋالىگىنسىز ءۇي اۋلاسىنا بۇرىلۋ كەزىندە جاياۋ جۇرگىنشىنى قاعىپ كەتكەن. جابىرلەنۋشى اۋىر جاراقات الىپ، اۋرۋحانادا قايتىس بولعان. ايىپتالۋشىنىڭ تۇسىندىرۋىنشە، ول رۋلگە وتىرعان، سەبەبى كۇيەۋىنىڭ جاعدايى ناشارلاپ كەتكەن. سوت وعان 2 جىل 6 ايعا باس بوستاندىعىنان ايىرۋ جازاسىن كەستى. قىلمىستىق كودەكستىڭ 74-بابى 1-بولىگى (كامەلەتكە تولماعان بالالارى بار ايەلدەرگە كەيىنگە قالدىرۋ) نەگىزىندە جازانى وتەۋ 3 جىلعا كەيىنگە شەگەرىلدى — سوتتالعان ايەلدىڭ تاربيەسىندە ەكى كامەلەتكە تولماعان بالاسى بار.
سونىمەن قاتار، قۇقىعى جوق ادامعا كولىك باسقارۋدى تاپسىرعان كولىك يەسىنە قاتىستى ءىس جەكە وندىرىسكە بولىنگەن. ول قىلمىستىق كودەكستىڭ 349-بابى 3-بولىگى بويىنشا تەرگەلگەن. اقمولا وبلىسى پوليسيا دەپارتامەنتىنىڭ 28 شىلدەدەگى حابارلاۋىنشا، «سوتقا دەيىنگى تەرگەۋ ناتيجەلەرى بويىنشا قازاقستان رەسپۋبليكاسى قىلمىستىق-پروسەستىك كودەكسىنىڭ 35-بابى 1-بولىگىنىڭ 3-تارماعى (امنيستيا اكتىسىن قولدانۋعا بايلانىستى) نەگىزىندە قىلمىستىق ءىستى توقتاتۋ تۋرالى پروسەسسۋالدىق شەشىم قابىلداندى».
ەسكە سالايىق، مامىر ايىندا الەۋمەتتىك جەلىلەردە كوكشەتاۋدا ايەل ادامدى قاعىپ كەتۋ ۆيدەوسى تارادى. كادرلاردا اۆتوكولىكتىڭ جاياۋ جۇرگىنشىنى قاعىپ، سودان كەيىن باسىپ وتكەنى كورىنگەن. رولدە كەيىن پوليسيا ۇستاعان ايەل بولعان. باستاپقىدا ەكى قىلمىستىق ءىس قوزعالعان — جۇرگىزۋشىگە جانە ونىڭ كۇيەۋىنە، ياعني كولىك يەسىنە، ول ايەلىنىڭ جۇرگىزۋشى كۋالىگى جوق ەكەنىن بىلگەن.