قاراعاندىدا سوت «كۇتپەگەن جاعدايلارعا» ارنالعان قولحات تۋرالى ءىستى قارادى: ءبىر تاراپ اقشانى قايتارۋدى تالاپ ەتسە، ەكىنشىسى ەشتەڭە الماعانىن مالىمدەدى، دەپ حابارلايدى infohub.kz.
جوعارعى سوتتىڭ رەسمي Telegram-ارناسىندا حابارلانعانداي، قاراعاندى قالاسى بوكەيحان اۋدانىنىڭ سوتىنا ءوزارا تالاپ-ارىزدار ءتۇستى: باستاپقى تالاپ – نەسيە شارتى بويىنشا اقشانى ءوندىرىپ الۋ، قارسى تالاپ – مامىلەنى جارامسىز دەپ تانۋ تۋرالى.
تالاپكەردىڭ ايتۋىنشا، تاراپتار اراسىندا نەسيە شارتى جاسالعان، وعان سايكەس جاۋاپكەرگە قارىزىن وتەۋ ءۇشىن اقشا بەرىلگەن. نەسيەنى قايتارۋ مىندەتتەمەسى ورىندالماعاندىقتان، تالاپكەر قارىز سوماسىن، تۇراقسىزدىق ايىپپ ۇلىن جانە سوت شىعىندارىن ءوندىرۋدى سۇراعان.
جاۋاپكەر تالاپپەن كەلىسپەي، قولحاتتى جارامسىز دەپ تانۋ تۋرالى قارسى تالاپ قويدى. ول اقشانى الماعانىن ءتۇسىندىردى. ونىڭ ايتۋىنشا، ول جۇمىسقا ورنالاسۋ ءۇشىن جەكە كاسىپكەرگە جۇگىنىپ، كولىك جالداۋ شارتىن جاساسقان. قولحات جەكە كاسىپكەردىڭ نۇسقاۋى بويىنشا «كۇتپەگەن جاعدايلارعا» ارنالىپ جازىلعان، ءبىراق ءىس جۇزىندە اقشا بەرىلمەگەن. جاۋاپكەر اۆتوكولىكتى ءبىر كۇن پايدالانىپ، قايتارعان. نەسيە شارتى بويىنشا بەرەشەگى مەن سوت اكتىسى تۋرالى ول كەيىن بىلگەن.
زاڭ بويىنشا نەسيە – ناقتى مامىلە جانە ول اقشانى قارىز الۋشىعا ناقتى بەرگەن ساتتەن باستاپ جاسالعان بولىپ ەسەپتەلەدى. الايدا تالاپكەر اقشانىڭ بەرىلگەنىن قۇجاتپەن راستاي المادى. ءىس ماتەريالدارى قولحاتتىڭ ناقتى اقشا الىنباي جازىلعانىن دالەلدەدى.
سونىمەن قاتار، سوت داۋلى مامىلەنىڭ زاڭناما تالاپتارىن، سونىڭ ىشىندە سۋبەكتىلىك قۇرام مەن تاراپتار ەركىنىڭ ەركىندىگىن بۇزا وتىرىپ جاسالعانىن انىقتادى. شارت جەكە كاسىپكەر مەن جەكە تۇلعا اراسىندا رەسىمدەلگەن، ال نەسيە بەرۋ زاڭنامادا بەلگىلەنگەن شەكتەۋلەرگە قايشى كەلگەن.
سوت ۇسىنىلعان دالەلدەمەلەردىڭ جيىنتىعىن باعالاي كەلە، اقشانىڭ ناقتى بەرىلگەنى راستالماعان دەگەن قورىتىندىعا كەلدى. وسىعان بايلانىستى قولحاتپەن رەسىمدەلگەن مامىلە جالعان بولىپ تابىلادى. سوت اقشانى ءوندىرۋ تۋرالى باستاپقى تالاپتى قاناعاتتاندىرۋدان باس تارتتى. قارسى تالاپ قاناعاتتاندىرىلىپ، قولحات بويىنشا مامىلە ازاماتتىق كودەكستىڭ 157-بابىنىڭ 1-تارماعى نەگىزىندە جارامسىز (جويىلعان) دەپ تانىلدى.
قاراعاندى وبلىستىق سوتىنىڭ ازاماتتىق ىستەر جونىندەگى سوت القاسىنىڭ قاۋلىسىمەن ءبىرىنشى ساتىداعى سوت شەشىمى وزگەرىسسىز قالدىرىلىپ، اپەللياسيالىق شاعىم قاناعاتتاندىرۋسىز قالدىرىلدى. سوت شەشىمى زاڭدى كۇشىنە ەندى.