قازاقستاندىق كوللەدجدەرگە وقۋ پروسەسىنەن تىس ۋاقىتتا سپورتزالدار مەن باسسەيندەردى جالعا بەرۋگە رۇقسات ەتىلدى. بۇل تۋرالى infohub.kz سايتى حابارلايدى.
وقۋ-اعارتۋ مينيسترلىگىنىڭ ءباسپاسوز قىزمەتىنىڭ مالىمەتىنشە، قازاقستان كوللەدجدەرى وقۋ پروسەسىنەن بوس ۋاقىتتا دەنە شىنىقتىرۋ-ساۋىقتىرۋ جانە سپورت نىساندارىن جالعا بەرۋ قۇقىعىنا يە بولدى. ءتيىستى وزگەرىستەر «ءبىلىم تۋرالى» زاڭعا «قازاقستان رەسپۋبليكاسىنىڭ الەۋمەتتىك زاڭناماسىن جەتىلدىرۋ ماسەلەلەرى بويىنشا كەيبىر زاڭنامالىق اكتىلەرىنە وزگەرىستەر مەن تولىقتىرۋلار ەنگىزۋ تۋرالى» زاڭ اياسىندا ەنگىزىلدى.
«بۇرىن مۇنداي مۇمكىندىك تەك جالپى ءبىلىم بەرەتىن مەكتەپتەرگە عانا قاراستىرىلعان ەدى. ەندى كوللەدجدەردىڭ سپورتزالدارى، باسسەيندەرى، ستاديوندارى جانە باسقا دا سپورت نىساندارى وقۋ ساباقتارى اياقتالعاننان كەيىن ەلدى مەكەن تۇرعىندارى پايدالانا الادى»، — دەلىنگەن ۆەدومستۆو حابارلاماسىندا.
جالعا بەرۋدەن تۇسكەن كىرىستى كوللەدجدەر سپورت قۇرىلىستارىن كۇتىپ-ۇستاۋعا جانە جوندەۋگە، زاماناۋي سپورت قۇرال-جابدىقتارىن ساتىپ الۋعا، سونداي-اق ماتەريالدىق-تەحنيكالىق بازانى دامىتۋعا جۇمساي الادى. بۇل ينفراقۇرىلىمدى ءتيىستى دەڭگەيدە ۇستاپ تۇرۋعا جانە كوللەدجدەردىڭ ءبىلىم بەرۋ قىزمەتىن دامىتۋ مۇمكىندىكتەرىن كەڭەيتۋگە سەپتىگىن تيگىزەتىنى اتاپ ءوتىلدى.
«قابىلدانعان وزگەرىستەر مەملەكەتتىك كوللەدجدەردىڭ سپورت ينفراقۇرىلىمىن تيىمدىرەك پايدالانۋدى قامتاماسىز ەتەدى، بۇقارالىق سپورتتى دامىتۋعا، سالاۋاتتى ءومىر سالتىن ناسيحاتتاۋعا جانە قازاقستان ازاماتتارىنىڭ دەنە شىنىقتىرۋمەن ساپالى جاعدايدا اينالىسۋىنا قولجەتىمدىلىكتى ارتتىرۋعا ىقپال ەتەدى»، — دەپ قوستى مينيسترلىك.