قازاقستاننىڭ ءبىلىم ءمينيسترى جۇلدىز سۇلەيمەنوۆا ەلىمىزدەگى كوللەدجدەردە ءبىلىم بەرۋ باعدارلامالارىنىڭ حالىقارالىق اككرەديتاسياسىنىڭ ناتيجەلەرى تۋرالى مالىمدەدى. پەداگوگتەر مەن ستۋدەنتتەر باعدارلامالاردىڭ الەمدىك ستاندارتتارعا سايكەستىگىن راستايتىن سەرتيفيكاتتارعا يە بولدى، دەپ حابارلايدى infohub.kz سايتى.
ءىس-شارا بارىسىندا ۆەدومستۆو باسشىسى 27 كوللەدجدە ءبىلىم بەرۋ باعدارلامالارىنىڭ حالىقارالىق سالالىق جانە كاسىبي تالاپتارعا سايكەستىگىن باعالاۋ ءراسىمى جۇرگىزىلگەنىن اتاپ ءوتتى. اككرەديتاسيا قورىتىندىسى بويىنشا 134 پەداگوگ پەن 347 ستۋدەنت حالىقارالىق سەرتيفيكات الدى.
«جىل باسىنان بەرى جۇڭگو، گەرمانيا، فرانسيا، تۇركيا، وڭتۇستىك كورەيا، فينليانديا، كانادا، سينگاپۋر، يتاليا، ۇلىبريتانيا جانە شۆەيساريانىڭ شەتەلدىك كوللەدجدەرىمەن اكادەميالىق ۇتقىرلىق، حالىقارالىق سالالىق اككرەديتاسيا جانە باسقا دا باعىتتار بويىنشا 80-گە جۋىق مەموراندۋم مەن كەلىسىمگە قول قويىلدى»، — دەپ ءتۇسىندىردى مينيستر.
جالپى، ونىڭ ايتۋىنشا، قازاقستاندا 763 كوللەدج جۇمىس ىستەيدى، وندا 556 مىڭ ستۋدەنت ءبىلىم الادى. «بيىل مەملەكەتتىك ءبىلىم بەرۋ تاپسىرىسى اياسىندا كوللەدجدەرگە 133 مىڭ ستۋدەنت قابىلداۋ جوسپارلانۋدا. مەملەكەتتىك ءبىلىم بەرۋ تاپسىرىسىنىڭ 70% تەحنيكالىق باعىتتار بويىنشا كادرلار دايارلاۋعا جۇمسالادى. كاسىپورىنداردىڭ وتىنىمدەرى نەگىزىندە مىندەتتى تۇردە جۇمىسقا ورنالاستىرۋمەن 10 مىڭنان استام ستۋدەنت قابىلداۋ جوسپارلانۋدا»، — دەپ قورىتىندىلادى ءبىلىم مينيسترلىگىنىڭ باسشىسى.