كولۋمبيا مەن برازيليا ەكولوگيالىق قورعاۋشىلاردىڭ قازا تابۋى بويىنشا الەمدە كوش باستاپ تۇر. Global Witness ناۋقاندىق توبى جاريالاعان جىلدىق ەسەپكە سايكەس، 2025 جىلى بۇكىل الەمدە كەمىندە 124 بەلسەندى ولتىرىلسە، ونىڭ 39-ى كولۋمبيادا، 26-سى برازيليادا قازا تاپقان، دەپ حابارلايدى infohub.kz سايتى.
ۇيىمنىڭ مالىمەتىنشە، تىركەلگەن قاستاندىقتاردىڭ 85 پايىزى لاتىن امەريكاسىندا بولعان. بۇل ايماق 2012 جىلى ەسەپتەر جاريالانا باستاعاننان بەرى جىل سايىن ەڭ ءقاۋىپتى ءوڭىر بولىپ تۇر. ولتىرىلگەندەردىڭ كوبى جەر داۋىنا بايلانىستى قازا تاپقان، ال كوپ جاعدايدا قىلمىستى جالدامالى قاسكويلەر نەمەسە ۇيىمداسقان قىلمىستىق توپ مۇشەلەرى جاساعان.
سوڭعى ءتورت جىلدا ەكولوگيالىق بەلسەندىلەردىڭ ءولتىرىلۋى بويىنشا كولۋمبيا كوش باستاپ كەلەدى. ەلدە قازا تاپقانداردىڭ جارتىسىنا جۋىعى بايىرعى حالىق وكىلدەرى، ال قالعاندارىنىڭ كوبى شاعىن شارۋالار بولعان.
كولۋمبياداعى كوپتەگەن بايىرعى توپتار ءوز اۋماقتارىن كۇزەتەتىن، ءبىراق قارۋسىز بايىرعى كۇزەتشىلەر جەلىسىن قۇرعان. بايىرعى كۇزەتشىلەر كوكنار — كوكاين جاسالاتىن شيكىزات — ەگۋ ءۇشىن نەمەسە زاڭسىز كەن قازۋمەن اينالىسۋ ءۇشىن اۋماعىن كەڭەيتپەك بولعان زاڭسىز قارۋلى توپتاردىڭ نىساناسىنا ءجيى ىلىگەدى. وتكەن اپتادا كولۋمبيانىڭ كاۋكا وڭىرىندەگى بايىرعى كۇزەت قۇرامىندا بولعان حاكوب گۋاچەتا سامبرانو ازاپتالىپ ولتىرىلگەن كۇيدە تابىلدى.
ونىڭ ءولىمىنىڭ ىقتيمال سەبەبى ءالى تەرگەلىپ، كىنالىنى ىزدەۋ جالعاسىپ جاتقانىمەن، بايىرعى كوشباسشىلار بۇل وڭىردە زاڭسىز قارۋلى توپتار اۋماق ءۇشىن شايقاسقاندىقتان، ءولتىرۋ، قورقىتۋ جانە ماجبۇرلەپ جوعالتۋ ءجيى كەزدەسەتىنىن ايتتى.
Global Witness برازيليادا 2025 جىلى ەكولوگيالىق قورعاۋشىلاردىڭ ءولتىرىلۋى 2024 جىلمەن سالىستىرعاندا ەكى ەسە وسكەنىن ەسكەرتتى. كولۋمبياداعىداي، برازيليادا دا ۇيىم تىركەگەن جاعدايلاردىڭ كوبى نەگىزىنەن جەر ءۇشىن تالاسقا بايلانىستى بولعان.
لاتىن امەريكاسىنان تىس جەرلەردە قاستاندىقتاردىڭ 12 پايىزى ازيادا بولعان، تىزىمدە 12 تىركەلگەن ولتىرۋمەن فيليپپين كوش باستاپ تۇر. ۇيىم الەمدە تىركەلگەن قاستاندىق سانى 2024 جىلعى 146-دان 2025 جىلى 128-گە ازايعانىمەن، كوپ جاعداي حابارلانباي قالعاندىقتان، بۇل ساندار شىن مانىندەگىدەن تومەن بولۋى مۇمكىن ەكەنىن ەسكەرتتى.