كولۋمبيا ۆيسە-پرەزيدەنتىنىڭ ۇلىنىڭ قىزى، جيىرما جاستاعى حۋليانا اۆيلا ساۋدا مەدەليندەگى جارتىلاي مارافونعا قاتىسقان سوڭ كوز جۇمدى. جۇگىرۋ كەزىندە ونىڭ جۇرەگى ءۇش رەت توقتاعان، دەپ حابارلايدى infohub.kz سايتى.
قىز 6 قىركۇيەكتە قاشىقتىقتا ەسىنەن تانىپ قالعان. دارىگەرلەر ءۇش رەت جان ساقتاۋ شارالارىن جاسادى، سودان كەيىن زارداپ شەككەن قىز اۋرۋحاناعا جەتكىزىلدى.
«حۋليانا اۆيلانىڭ وتباسىنا، ۆيسە-پرەزيدەنتىمىزگە، ونىڭ ۇلى حۋليانعا جانە ولاردىڭ بارلىق جاقىندارىنا وسى اۋىر ءارى كۇتپەگەن قازا ءۇشىن قايعىرىپ كوڭىل ايتامىن»، — دەدى ەل پرەزيدەنتى ابەلاردو دە لا ەسپريەليا.
قايعىلى وقيعا 30 مىڭنان استام ادام قاتىسقان مەدەلين مارافونى بارىسىندا بولدى. جۇگىرۋ كەزىندە بيومەديسينالىق ينجەنەريا فاكۋلتەتىنىڭ 20 جاستاعى ستۋدەنتى حۋليانا اۆيلا ساۋدا قاشىقتىقتا كەنەتتەن ەسىنەن تانىپ قالدى.
قىزدى مەدەليننىڭ باس اۋرۋحاناسىنا جەدەل جاتقىزدى. وندا دارىگەرلەر جۇرەگى توقتاعان سوڭ ونى ءۇش رەت تىرىلتە الدى، الايدا كەلەسى كۇنى ول قايتىس بولدى. جەرگىلىكتى بيلىك ءولىمنىڭ ناقتى سوت-مەديسينالىق سەبەبى ازىرگە انىقتالماعانىن اتاپ ءوتتى. بۇل وقيعا وسى جارىستاردا سوڭعى سەگىز جىلدا تىركەلگەن ءتورتىنشى ءولىم بولدى.