ەكى جارىم جىلدىڭ ىشىندە الماتى وبلىسىنداعى ويىن بيزنەسى بيۋدجەتكە 184،7 ملرد تەڭگە سالىق ءتۇسىردى، ونىڭ 53،8 ملرد تەڭگەسى وبلىستىق قازىناعا كەلىپ ءتۇستى. تەك سوڭعى جارتى جىلدا عانا كازينولار 25 ملرد تەڭگە سالىق اۋداردى، ونىڭ ىشىندە 10،6 ملرد تەڭگەسى وبلىستىق بيۋدجەتكە تيەسىلى، دەپ حابارلايدى infohub.kz سايتى.
قازىرگى ۋاقىتتا قونايەۆ قالاسىندا ويىن بيزنەسىنىڭ 21 نىسانى زاڭدى تۇردە جۇمىس ىستەيدى: بەس كازينو، ءۇش ويىن اۆتوماتتارى زالى جانە 13 بۋكمەكەرلىك كەڭسە. كازينوعا كەلۋشىلەردىڭ شامامەن 20% شەتەلدىكتەر، بۇل ءتۋريزمدى دامىتۋعا سەرپىن بەرەدى. وبلىستىق تۋريزم باسقارماسىنىڭ باسشىسى قۋانىشبەك ميرامبەك ۇلىنىڭ ايتۋىنشا، قوناەۆقا كەلگەن ءاربىر تۋريست قوناقۇيلەرگە ورنالاسىپ، مەيرامحانالارعا بارادى، كولىك جانە ساۋدا قىزمەتتەرىن پايدالانادى. بۇل شاعىن جانە ورتا بيزنەستىڭ دامۋىنا جانە جاڭا جۇمىس ورىندارىنىڭ اشىلۋىنا ىقپال ەتەدى.
قوناەۆتان باسقا، «ويىن بيزنەسى تۋرالى» زاڭعا سايكەس، تالعار اۋدانىندا تاعى ءبىر ارنايى ويىن ايماعىن قۇرۋ جوسپارلانۋدا. ءوڭىردىڭ قوعامدىق كەڭەسى بۇل ۇسىنىستى الدەقاشان قولدادى. تالعار اۋدانى قوناەۆقا قاراعاندا الماتىعا جاقىن ورنالاسقان، حالىقارالىق اۋەجاي ماڭىندا جانە تاۋلى، ساۋىقتىرۋ جانە دەمالىس ءتۋريزمىنىڭ دامىعان ينفراقۇرىلىمى بار. جاڭا ايماق تەك شەتەلدىكتەرگە عانا قىزمەت كورسەتەدى. قۋانىشبەك ميرامبەك ۇلىنىڭ سوزىنە قاراعاندا، ول ءوڭىردىڭ تۋريستىك ەكوجۇيەسىنىڭ ءبىر بولىگى رەتىندە قاراستىرىلادى، بۇل قىزمەت اۋقىمىن كەڭەيتۋگە جانە سەرۆيستىك ينفراقۇرىلىمدى، ونىڭ ىشىندە ءقوناقۇي بيزنەسىن، قوعامدىق تاماقتاندىرۋدى، كولىك پەن ساۋدانى دامىتۋ ءۇشىن قوسىمشا مۇمكىندىكتەر تۋعىزۋعا مۇمكىندىك بەرەدى.
بۇعان دەيىن 463 مىڭنان استام قازاقستاندىق Egov پورتالى ارقىلى قۇمار ويىندارعا قاتىسۋدان ءوزىن-وزى شەكتەۋدى ورناتقانى حابارلانعان بولاتىن.