بيىلعى جىلدىڭ العاشقى التى ايىندا الماتى وبلىسىنىڭ ويىن بيزنەسى مەملەكەتتىك بيۋدجەتكە 25 ميلليارد تەڭگە سالىق تولەدى، ونىڭ 10،6 ميلليارد تەڭگەسى وبلىستىق قازىناعا ءتۇستى، دەپ حابارلايدى infohub.kz سايتى.
جالپى سوڭعى ەكى جارىم جىلدا سالا 184،7 ميلليارد تەڭگە سالىق اۋداردى، ونىڭ 53،8 ميلليارد تەڭگەسى وبلىس بيۋدجەتىنە جىبەرىلدى. قازىرگى ۋاقىتتا قونايەۆ قالاسىندا ويىن بيزنەسىنىڭ 21 نىسانى جۇمىس ىستەيدى: 5 كازينو، 13 بۋكمەكەرلىك كەڭسە جانە 3 ويىن اۆتوماتتارى زالى. سالادا 2،5 مىڭعا جۋىق ادام جۇمىس ىستەيدى.
ويىن بيزنەسى ءتۋريزمنىڭ دامۋىنا دا ىقپال ەتەدى. تۋريزم باسقارماسىنىڭ دەرەگىنشە، كازينو كەلۋشىلەرىنىڭ شامامەن 20 پايىزى — شەتەل ازاماتتارى. «قونايەۆ قالاسىنا كەلگەن ءاربىر تۋريست قوناقۇيلەرگە ورنالاسىپ، قوعامدىق تاماقتانۋ ورىندارىنا بارادى، كولىك، ساۋدا جانە باسقا دا قىزمەتتەردى پايدالانادى. بۇل ءوز كەزەگىندە شاعىن جانە ورتا بيزنەستىڭ دامۋىنا، جاڭا جۇمىس ورىندارىنىڭ اشىلۋىنا جانە جەرگىلىكتى ەكونوميكانىڭ جاندانۋىنا ىقپال ەتەدى. سوندىقتان تۋريستىك اعىننىڭ ۇلعايۋى ايماقتاعى قىزمەت كورسەتۋ سالاسىنىڭ دامۋىنا وڭ اسەر ەتەدى»، — دەدى تۋريزم باسقارماسىنىڭ باسشىسى قۋانىشبەك ميرامبەك ۇلى.
قولدانىستاعى «ويىن بيزنەسى تۋرالى» زاڭ اياسىندا تالعار اۋدانىندا تەك شەتەل ازاماتتارىنا ارنالعان جاڭا ويىن ايماعىن قۇرۋ جوسپارلانۋدا. بۇل باستاما قوعامدىق كەڭەستىڭ وڭ قورىتىندىسىن الدى. جوبانىڭ تالعار اۋدانىنا ورنالاسۋى ونىڭ جوعارى تۋريستىك الەۋەتىمەن تۇسىندىرىلەدى: اۋدان الماتى جانە حالىقارالىق اۋەجايعا جاقىن ورنالاسقان، سونىمەن قاتار تاۋ، ساۋىقتىرۋ جانە رەكرەاسيالىق ءتۋريزمنىڭ دامىعان ينفراقۇرىلىمى بار.
«تالعار اۋدانى ايماقتىڭ ەڭ دامىعان تۋريستىك باعىتتارىنىڭ ءبىرى. مۇندا «اقبۇلاق» سپورتتىق-ساۋىقتىرۋ كەشەنى، «Oi-Qaragai» تاۋ شاڭعىسى كۋرورتى، Aquaasia Resort كۋرورتتىق كەشەنى جانە Tal Resort دەمالىس ايماعى ورنالاسقان. سوندىقتان جاڭا ويىن ايماعى ايماقتىڭ تۋريستىك ەكوجۇيەسىنىڭ بولىگى رەتىندە قاراستىرىلادى. بۇل تۋريستىك قىزمەتتەردىڭ اۋقىمىن كەڭەيتۋگە جانە سەرۆيستىك ينفراقۇرىلىمدى دامىتۋعا قوسىمشا مۇمكىندىكتەر جاسايدى»، — دەپ اتاپ ءوتتى قۋانىشبەك ميرامبەك ۇلى.
اكىمدىكتە جوبانىڭ ىسكە اسىرىلۋى ءقوناقۇي بيزنەسىنىڭ، قوعامدىق تاماقتانۋ سالاسىنىڭ، كولىك، ساۋدا جانە باسقا دا قىزمەتتەردىڭ دامۋىنا سەرپىن بەرەتىنىن، جاڭا جۇمىس ورىندارىن قۇراتىنىن، ينۆەستيسيالار تارتاتىنىن جانە بيۋدجەتتىڭ كىرىس بولىگىن ارتتىراتىنىن قوستى.