كونگو دەموكراتيالىق رەسپۋبليكاسىندا ەبولا بەزگەگى ىندەتىنە بايلانىستى احۋال كۇرت ناشارلادى: قازا تاپقاندار سانى 3779 ادامعا جەتتى، ال راستالعان جۇقپا جاعدايلارىنىڭ جالپى سانى 7820-نى قۇرايدى. ەڭ اۋىر جاعداي سولتۇستىك كيۆۋ پروۆينسياسىندا قالىپتاستى، دەپ حابارلايدى infohub.kz سايتى.
Reuters اگەنتتىگىنىڭ مالىمەتىنشە، حالقى ەكى ميلليون بۋتەمبو قالاسىندا ەمدەۋ ورتالىقتارى لىق تولى، اۋىر حالدەگى ناۋقاستار بوس توسەك تابا الماي وتىر.
«سوڭعى ەكى اپتادا سىرقاتتانۋشىلار سانىنىڭ كۇرت وسكەنىن بايقاپ وتىرمىز. كەيدە وزىندە ەبولا بار ەكەنىن بىلەتىن، ءبىراق اۋرۋحانادان توسەك تابا المايتىن ناۋقاستار كەزدەسەدى»، — دەپ كەلتىرەدى باسىلىم «دارىگەرلەر شەكاراسىز» حالىقارالىق مەديسينالىق قايىرىمدىلىق ۇيىمى جوباسىنىڭ ۇيلەستىرۋشىسى ستەفاني حوففمانننىڭ سوزدەرىن.
قالا بيلىگى سۇرانىستىڭ ارتۋىنا بايلانىستى قوسىمشا تاعى ەكى مەديسينالىق ورتالىق اشتى، الايدا كەيبىر ناۋقاستار سونشالىقتى اۋىر حالدە كەلىپ تۇسەدى، دارىگەرلەر ولارعا ەندى كومەكتەسە المايدى.
حوففمانننىڭ ايتۋىنشا، بىرنەشە كۇن بۇرىن ونىڭ كوزىنشە 10 جاسار بالا كوز جۇمدى — ول كلينيكادان ورىن كۇتىپ، قابىلداۋ بولىمىندە قايتىس بولدى.
الدىڭعى شەپتەگى مەديسينا قىزمەتكەرلەرى اۋرۋ جاعدايلارى جاڭا ءارى جەتكىلىكتى دايىندىعى جوق اۋدانداردا ءالى دە تىركەلىپ جاتقانىن اتاپ ءوتتى.
«كەيبىر ەبولانى ەمدەۋ ورتالىقتارى ناۋقاستاردى ازىراق قابىلدايدى دەپ، ىندەت باقىلاۋدا دەپ ويلاۋ قاتە بولار ەدى. ىندەت ازايىپ جاتقان جوق، ول تارالىپ بارادى»، — دەدى «دارىگەرلەر شەكاراسىز» ۇيىمىنىڭ توتەنشە جاعدايلار جونىندەگى ۇيلەستىرۋشىسى ەنتوني كەرگوسەن.
بۇعان دەيىن «كۋرسيۆ» كونگو در-دا كلينيكالىق سىناقتار ءۇشىن ەبولاعا قارسى ۆاكسينانىڭ 20 000 دوزاسى بولىنگەنىن جازعان بولاتىن.