قازاقستاننىڭ كونستيتۋسيالىق سوتى بانكروتتىق ءراسىمىن جۇرگىزۋ جانە بانكروتتى تاراتۋدى اياقتاۋ مەرزىمدەرىن رەتتەيتىن «وڭالتۋ جانە بانكروتتىق تۋرالى» زاڭنىڭ جەكەلەگەن نورمالارىنىڭ زاڭدىلىعىن داۋلاعان ازاماتتىڭ ءوتىنىشىن قارادى، دەپ حابارلايدى infohub.kz سايتى.
سوتتىڭ ءباسپاسوز قىزمەتى تۇسىندىرگەندەي، ءوتىنىش بەرۋشى داۋلانعان نورمالار زاڭدا بەلگىلەنگەن بەس جىلدىق مەرزىم وتكەننەن كەيىن دە بانكروتتىق ءراسىمىن جالعاستىرۋعا جول بەرەتىنىن جانە بۇل ونىڭ كونستيتۋسيالىق قۇقىقتارىن بۇزاتىنىن العا تارتقان.
«ءوتىنىش بەرۋشى داۋلانعان نورمالار زاڭدا بەلگىلەنگەن بەس جىلدىق مەرزىم وتكەننەن كەيىن دە بانكروتتىق ءراسىمىن جالعاستىرۋعا جول بەرىپ، ونىڭ كونستيتۋسيالىق قۇقىقتارىن بۇزادى دەپ ەسەپتەدى»، — دەلىنگەن حابارلامادا.
كونستيتۋسيالىق سوت زاڭنىڭ 84-بابىنىڭ 1-تارماعى ءوتىنىش بەرۋشىنىڭ ىسىندە سوتتارمەن قولدانىلماعانىن انىقتادى. «الايدا ازاماتتىڭ ءوتىنىشىن كونستيتۋسيالىق تەكسەرۋگە جىبەرۋدىڭ قاجەتتى شارتى — داۋلانعان نورمانىڭ سوت تاراپىنان ءوتىنىش بەرۋشىنىڭ قۇقىقتارى مەن بوستاندىقتارىنا تىكەلەي قاتىستى ناقتى ىستە قولدانىلۋى. زاڭنىڭ 112-بابىنىڭ 1-تارماعىنا قاتىستى ءوتىنىش بەرۋشى ونىڭ كونستيتۋسياعا سايكەس كەلمەيتىنىنە جەتكىلىكتى قۇقىقتىق نەگىزدەمە كەلتىرمەگەن»، — دەپ ناقتىلادى سوتتا.
زاڭدا بەلگىلەنگەن جىبەرۋ شارتتارى بولماعاندىقتان، ءوتىنىش كونستيتۋسيالىق ءىس جۇرگىزۋگە قابىلدانبادى.