جاپونيا عالىمدارى كوشەلەردى كوگالداندىرۋ ۇيقى ساپاسىن جاقسارتۋى مۇمكىن ەكەنىن انىقتادى. زەرتتەۋ كورسەتكەندەي، جايلى قالالىق ورتا مەگاپوليستەردە تۇراتىنداردىڭ دەمالىسىنا وڭ اسەر ەتەدى، دەپ حابارلايدى infohub.kz سايتى.
ماماندار Google Street View قىزمەتىندەگى توكيو كوشەلەرىنىڭ 200 مىڭنان استام سۋرەتىن جاساندى ينتەللەكت كومەگىمەن تالدادى. الىنعان دەرەكتەردى قالادا تۇراتىن 40 پەن 59 جاس ارالىعىنداعى 1089 جۇمىس ىستەيتىن تۇرعىننىڭ ۇيقىسى تۋرالى اقپاراتپەن سالىستىردى.
كوگالداندىرىلعان اۋدانداردا تۇراتىن ادامدار ورتا ەسەپپەن ۇزاعىراق ۇيىقتايتىنى بەلگىلى بولدى. سونىمەن قاتار، كوشەلەرى اعاشتارمەن نەمەسە عيماراتتارمەن «كومكەرىلگەن» اۋدانداردا تۇراتىنداردا ۇيقى ۇزاقتىعى ارتىپ، ۇيقىسىزدىق بەلگىلەرى ازايعان.
بۇل بايلانىستىڭ ءبىر بولىگى اۋداندى سۋبەكتيۆتى قابىلداۋمەن تۇسىندىرىلەدى. تۇرعىندار كوگالدى جانە جابىق كوشەلەردى ءقاۋىپسىز ءارى جاندى دەپ سانايدى، ال بۇل سەزىمدەر، اۆتورلاردىڭ پىكىرىنشە، ۇيقى ساپاسىنا وڭ اسەر ەتەدى.
تاعى ءبىر ناتيجە كۇتپەگەن بولدى. جاياۋ جۇرگىنشىلەرگە ىڭعايلى كوشە جوسپارى بار اۋداندار ۇيقى ۇزاقتىعىنىڭ قىسقارۋىمەن بايلانىستى بولدى. زەرتتەۋشىلەر بۇل كەيبىر تۇرعىنداردىڭ مۇنداي اۋدانداردى ءقاۋىپسىز دەپ ساناماۋىنان بولۋى مۇمكىن دەپ بولجايدى.
الىنعان دەرەكتەر ساۋلەتشىلەر مەن بيلىككە قالالىق ورتانىڭ ادام دەنساۋلىعىنا اسەرىن ەسكەرە وتىرىپ، ءومىر سۇرۋگە قولايلى اۋدانداردى جوبالاۋدا پايدالى بولۋى مۇمكىن.
زەرتتەۋ قالالىق ورتا ەرەكشەلىكتەرى مەن ۇيقى اراسىنداعى ىقتيمال بايلانىستى عانا انىقتادى. ول جاسىل كوشەلەر ۇيقى ساپاسىن تىكەلەي جاقسارتادى نەمەسە ناشارلاتادى دەگەندى دالەلدەمەيدى.