امەريكالىق زەرتتەۋشىلەر كوزدىڭ قاساڭ قابىعىن ەلەكتر توعىمەن وزگەرتۋدىڭ قانسىز ءتاسىلىن ۇسىندى، — دەپ جازادى ScienceDaily پورتالى، حابارلايدى infohub.kz سايتى.
جاڭا تەحنولوگيا ەلەكترومەحانيكالىق ءپىشىن وزگەرتۋ (EMR) دەپ اتالدى. اۆتورلاردىڭ ويىنشا، ول ءداستۇرلى LASIK لازەرلىك تۇزەتۋىنە قاراعاندا قاراپايىم ءارى ارزان بالاما بولا الادى.
عالىمدار قاساڭ قابىق تىندەرىن لازەرمەن كەسىپ الۋدىڭ ورنىنا ءالسىز ەلەكتر توعىن پايدالانادى. ەلەكتر ءيمپۋلسى كوز تىندەرىندەگى pH دەڭگەيىن ءبىراز ۋاقىتقا وزگەرتىپ، قاساڭ قابىقتىڭ قاتتىلىعىنا جاۋاپ بەرەتىن نەگىزگى اقۋىز — كوللاگەندى جۇمسارتادى. وسى ساتتە تىندەر سەرپىمدى بولىپ، كەرەك ءپىشىندى وڭاي قابىلدايدى، ال pH دەڭگەيى قالپىنا كەلگەن سوڭ قاساڭ قابىقتىڭ قاتتىلىعى قايتا ورالادى.
تاجىريبە بارىسىندا زەرتتەۋشىلەر قويانداردىڭ كوزىنە ەلەكترود ءارى ءيىلۋ ءپىشىنى قىزمەتىن اتقارعان پلاتينا لينزالار كيگىزدى. ءالسىز توك اسەرىنەن قاساڭ قابىق نەبارى ءبىر مينۋتتا ءپىشىنىن وزگەرتىپ، بارلىق 10 سىناق ۇلگىسىندە دە جاقىننان كورۋ ماسەلەسىن ءساتتى وتەدى. سونىمەن قاتار pH دەڭگەيى جوعارى دالدىكپەن باقىلانعاندىقتان، كوز جاسۋشالارى زارداپ شەكپەدى.
ءادىس زەرتحانادا تاماشا ناتيجە كورسەتتى، ءبىراق ونى ادامدارعا قولدانۋعا ءالى كوپ ۋاقىت كەرەك. عالىمدار تەحنولوگيانىڭ قاۋىپسىزدىگىنە كوز جەتكىزۋ جانە تۇزەتۋدىڭ الىنعان اسەرى قانشا ۋاقىت ساقتالاتىنىن ءبىلۋ ءۇشىن ءتىرى جانۋارلاردا ۇزاق سىناقتار جۇرگىزۋى ءتيىس.