قوستاناي تۇرعىنى ءوزىنىڭ Damumed جۇيەسىندەگى ەلەكتروندى مەديسينالىق كارتاسىنان №5 ەمحانانىڭ كۇندىزگى ستاسيونارىندا ەمدەلگەنى تۋرالى جالعان جازبالاردى تاپتى. قويىلعان اۋىر دياگنوزعا بايلانىستى قىز ەندى جۇرگىزۋشى كۋالىگىن الۋ ءۇشىن مەديسينالىق كوميسسيادان وتە المايدى. بۇل تۋرالى ول Threads الەۋمەتتىك جەلىسىندە حابارلادى، دەپ مالىمدەيدى infohub.kz سايتى.
«Damumed قوسىمشاسىنا كەزدەيسوق كىرىپ، 17-21 تامىز ارالىعىندا مەن قوستاناي قالاسىنداعى №5 ەمحانانىڭ كۇندىزگى ستاسيونارىندا جاتقانىمدى انىقتادىم. ماعان تامشىلار، ينەكسيالار كۋرسىن جۇرگىزىپ، ەپيلەپسيالىق سيندرومدار دەگەن دياگنوزبەن ءۇزىندى جازعان»، – دەپ جازدى نەللي.
قىزدىڭ ايتۋىنشا، ول بۇل ۋاقىتتا دارىگەرلەرگە جۇگىنبەگەن. ونىڭ ۇستىنە، كورسەتىلگەن كۇندەرى ول قالادا دا بولماعان. ال ەڭ وكىنىشتىسى، ول جۇرگىزۋشى كۋالىگىن الۋعا وقۋعا تۇسپەك بولعان، ءبىراق مەديسينالىق كارتاداعى دياگنوز وعان بۇل مۇمكىندىكتى بەرمەيدى.
«وسى ويدان شىعارىلعان دياگنوزدىڭ كەسىرىنەن مەن ەندى مەديسينالىق كوميسسيادان وتە المايمىن. مۇنداي جازباسى بار 073/ۋ انىقتاماسىنا ەشكىم قول قويمايدى»، – دەپ اتاپ ءوتتى ول.
قىز e-Otinish ارقىلى فسمس-كە ءوتىنىش جازعانىن جانە قازاقستاندىقتاردان مۇنداي جاعدايدا نە ىستەۋ كەرەكتىگى تۋرالى كەڭەس سۇراعانىن ايتتى.
پىكىرلەردە پايدالانۋشىلار قىزدى قولداپ، مۇنداي دياگنوزعا تاڭ قالدى، بۇل اۋرۋعا ارنالعان پرەپاراتتار تەك رەسەپت بويىنشا بەرىلەتىنىن اتاپ ءوتتى.
«ال ەپيلەپسياعا قارسى پرەپاراتتار قاتاڭ تۇردە رەسەپت بويىنشا بەرىلەدى جانە ولار ءارقاشان تاپشى. بۇرىن ولاردىڭ وزدەرى ساتادى دەگەن تەوريا بولعان، ونشا سەنبەۋشى ەدىم، ءبىراق ءسىزدىڭ جازباڭىز راستاۋ سياقتى»، – دەپ جازدى aselfromkz پايدالانۋشىسى.
« قىزىعۋشىلىق ءۇشىن ءقازىر ءوز دامۋمەدىمە كىردىم، مەندە ماۋسىم ايىندا رەنتگەننەن وتكەنىم جازىلىپتى»، – دەپ جازدى vzefire.
تاعى ءبىر پايدالانۋشى sailorsalta جۇيەدە ۇقساس دەرەكتەر كەزدەسۋى مۇمكىن دەپ بولجادى.
«ءوزىم مەديسينادا جۇمىس ىستەدىم، ءبىراق مۇنداي جاعدايعا تاپ بولدىم. تەك مەديسينالىق ءتىزىلىم بويىنشا مەن اقتاۋدا تۇرىپ، سوندا بەكىتىلگەن بولىپ شىقتىم. ال مەن بۇل قالادا ومىرىمدە بولعان ەمەسپىن. ءبىراق مەنىڭ تولىق اتى-جونىمدەس ادام سوندا تۇراتىنىن بىلەتىنمىن، مىنە، ونىڭ دەرەكتەرى ماعان اۋىسىپتى. بۇل وتە ىقتيمال»، – دەپ اتاپ ءوتتى ول.
قوستاناي وبلىسىنىڭ دەنساۋلىق ساقتاۋ باسقارماسى «كۋرسيۆكە» قوستانايلىق ايەل حابارلاعان جالعان جازبا بويىنشا قىزمەتتىك تەكسەرۋ ءجۇرىپ جاتقانىن حابارلادى.
«قىزمەتتىك تەرگەۋ ءجۇرىپ جاتىر، اقپاراتتىق جۇيەدە كورسەتىلگەن جازبانىڭ پايدا بولۋ سەبەپتەرى مەن ءمان-جايلارى انىقتالۋدا»، – دەلىنگەن حابارلامادا.
ۆەدومستۆو تەرگەۋ ناتيجەلەرى بويىنشا قوسىمشا اقپارات بەرەتىنىن ۋادە ەتتى.
بۇعان دەيىن «كۋرسيۆ» ەلدە ءمامس جۇيەسىندەگى قارجىلىق باقىلاۋ ءتاسىلىن وزگەرتىپ جاتقانىن جازعان بولاتىن. جالعان جازبالارمەن كۇرەسۋگە جاڭا سيفرلىق پلاتفورما كومەكتەسۋى ءتيىس.