قوستاناي تۇرعىنى عيماراتتىڭ توبەسىنەن قۇلاعان مۇزدان كولىگىنىڭ زاقىمدانۋى ءۇشىن سوت ارقىلى وتەماقى الدى. كولىك يەسىنە 2 ميلليون تەڭگە ءوندىرىلدى، دەپ حابارلايدى infohub.kz.
قوستاناي وبلىسى سوتتارىنىڭ رەسمي Telegram-ارناسىندا حابارلانعانداي، قوستاناي قالالىق سوتى عيماراتتىڭ توبەسىنەن مۇزدىڭ قۇلاۋىنان كەلتىرىلگەن ماتەريالدىق شىعىندى ءوندىرۋ تۋرالى تالاپ ارىز بويىنشا ازاماتتىق ءىستى قارادى.
سوت انىقتاعانداي، 2026 جىلدىڭ ناۋرىزىندا قوستانايداعى اباي داڭعىلى بويىنداعى عيماراتتىڭ توبەسىنەن تالاپكەردىڭ تۇراقتا تۇرعان كولىگىنە قار-مۇز ماسساسى قۇلاعان، سالدارىنان كولىك مەحانيكالىق زاقىم العان. شىعىن مولشەرى تاۋەلسىز باعالاۋ قورىتىندىلارىمەن راستالعان: قالپىنا كەلتىرۋ جوندەۋ قۇنى 1،8 ميلليون تەڭگەدەن اسقان، ال تاۋار قۇنىنىڭ جوعالۋى 180 مىڭ تەڭگەنى قۇراعان.
جاۋاپكەر، جەكە كاسىپكەر، قار مەن مۇزدىڭ ءتۇسۋى مۇمكىن ەكەندىگى تۋرالى ەسكەرتۋ حابارلاندىرۋلارىنىڭ بولعانىن العا تارتىپ، تالاپقا قارسىلىق بىلدىرگەن. الايدا سوت ۇسىنىلعان فوتوسۋرەتتەردەن ولاردىڭ جاسالعان جانە ورنالاستىرىلعان ۋاقىتىن انىقتاۋ مۇمكىن ەمەس ەكەنىن انىقتادى. وقيعادان كەيىن بىردەن تۇسىرىلگەن بەينەجازبا ەسكەرتۋ بەلگىلەرى مەن حابارلاندىرۋلاردىڭ جوقتىعىن راستادى.
ءىستى قاراۋ بارىسىندا سوت ازاماتتىق كودەكستىڭ 9 جانە 917-باپتارىن، سونداي-اق قوستاناي وبلىسىنىڭ قالالارى مەن ەلدى مەكەندەرىنىڭ اۋماقتارىن اباتتاندىرۋ قاعيدالارىن باسشىلىققا الدى. وسى قاعيدالارعا سايكەس، شاتىردى قار مەن مۇزدان ۋاقتىلى تازارتۋ جانە ازاماتتاردىڭ جانە ولاردىڭ مۇلكىنىڭ قاۋىپسىزدىگىن قامتاماسىز ەتۋ مىندەتى عيماراتتىڭ يەسىنە جۇكتەلەدى.
سوت جاۋاپكەردىڭ زيان كەلتىرۋدى بولدىرماۋ ءۇشىن بارلىق قاجەتتى شارالاردى قابىلداماعانى تۋرالى قورىتىندىعا كەلدى جانە تالاپتى قاناعاتتاندىردى. سوت شەشىمىمەن جەكە كاسىپكەردەن تالاپكەردىڭ پايداسىنا 2 ميلليون تەڭگە كولەمىندە ماتەريالدىق شىعىن ءوندىرىلدى. سوت شەشىمى زاڭدى كۇشىنە ەنگەن جوق.