قوستاناي وبلىسىندا 28 جاستاعى جەرگىلىكتى تۇرعىنعا قاتىستى ۇكىم شىقتى. ول ءتورت جىل بويى Binance پلاتفورماسىندا زاڭسىز كريپتوۆاليۋتا ساۋداسىمەن اينالىسقان. سوت ونى ەكى جىلعا باس بوستاندىعىنان ايىرىپ، مۇلكىن تاركىلەدى، دەپ حابارلايدى infohub.kz.
2020 جىلدان 2024 جىلعا دەيىن ەر ادام ليسەنزياسىز Binanceء-تىڭ P2P ءبولىمى ارقىلى كريپتوۆاليۋتا ساتىپ الىپ، ساتقان. وپەراسيالار ءۇشىن ول ءوز اتىنا، تۋىستارى مەن باسقا ادامدارعا راسىمدەلگەن بانك شوتتارىن پايدالانعان. تاپقان اقشاسىن بانكتەردەگى دەپوزيتتەرگە جاسىرعان.
«زاڭسىز تابىس 1،9 ملرد تەڭگەدەن استى. ول اقشانى قىلمىستىق شىعۋ تەگىن جاسىرۋ ءۇشىن بانك دەپوزيتتەرىنە ورنالاستىرعان»، — دەلىنگەن سوت ماتەريالدارىندا.
پروكۋراتۋرا تالاپ قويۋى بويىنشا سوت سوتتالعاننان 1،9 ملرد تەڭگەنى مەملەكەت كىرىسىنە ءوندىرىپ الدى. سونىمەن قاتار، 13،4 ملن تەڭگە قولما-قول اقشا، ەكى جەڭىل كولىك جانە 7،9 مىڭ دوللار كولەمىندەگى كريپتوۆاليۋتا تاركىلەندى. وعان جەتى جىل بويى ماينينگپەن جانە سيفرلىق اكتيۆتەرمەن كەز كەلگەن وپەراسيالارمەن اينالىسۋعا تىيىم سالىندى.
بۇعان دەيىن قازاقستان العاش رەت مەملەكەتتىك كريپتورەزەرۆتى ماينينگ ەسەبىنەن تولىقتىرۋدى جوسپارلاپ وتىرعانى حابارلانعان بولاتىن. ءىرى كومپانيالارعا ون جىلعا بەكىتىلگەن تاريف بويىنشا ەلەكتر ەنەرگياسى ۇسىنىلادى، ونىڭ ورنىنا ولار وندىرىلگەن كريپتوۆاليۋتانىڭ 10 پايىزىن مەملەكەتكە تەگىن بەرەدى. ستراتەگيالىق ماينينگ ءۇشىن العاشقى ەلەكتر ەنەرگياسىن جەتكىزۋشى ەكىباستۇز گرەس-1 بولادى.