قوستاناي قالالىق سوتى عيماراتتىڭ شاتىرىنان قار-مۇز ماسساسى قۇلاپ، اۆتوكولىگى زاقىمدالعان يەسىنىڭ تالابىن قاناعاتتاندىردى. سوت جەكە كاسىپكەردەن 2 ملن تەڭگە وتەماقى ءوندىرىپ الۋ تۋرالى شەشىم شىعاردى، دەپ حابارلايدى infohub.kz.
سوتتا انىقتالعانداي، وقيعا 2026 جىلدىڭ ناۋرىز ايىندا قوستانايداعى اباي داڭعىلىندا بولعان. تالاپكەردىڭ تۇراقتا تۇرعان كولىگىنە قار-مۇز ماسساسى قۇلاپ، مەحانيكالىق زاقىم كەلتىرگەن.
زاقىم كولەمى تاۋەلسىز باعالاۋمەن راستالدى. ساراپشىلاردىڭ قورىتىندىسى بويىنشا، قالپىنا كەلتىرۋ جوندەۋ قۇنى 1،8 ملن تەڭگەدەن اسقان، ال كولىكتىڭ تاۋارلىق قۇنىنىڭ جوعالۋى 180 مىڭ تەڭگەنى قۇراعان.
جاۋاپكەر عيماراتتىڭ جانىنا قار مەن مۇزدىڭ ءتۇسۋى مۇمكىن ەكەندىگى تۋرالى ەسكەرتۋ حابارلاندىرۋلارى ورنالاستىرىلعانىن ايتىپ، تالاپتى قاناعاتتاندىرماۋدى سۇراعان. الايدا سوت بۇل دالەلدى سەنىمسىز دەپ تاپتى: ۇسىنىلعان سۋرەتتەر تۇسىرىلگەن ۋاقىت پەن ەسكەرتۋلەردىڭ ورنالاستىرىلعان ۋاقىتىن انىقتاۋعا مۇمكىندىك بەرمەگەن. سونىمەن قاتار، وقيعادان كەيىن بىردەن جاسالعان بەينەجازبا مۇز تۇسكەن كەزدە ەشقانداي بەلگىلەر مەن حابارلاندىرۋلاردىڭ بولماعانىن كورسەتكەن.
شەشىم شىعارۋ كەزىندە سوت قازاقستان رەسپۋبليكاسى ازاماتتىق كودەكسىنىڭ 9 جانە 917-باپتارىن، سونداي-اق قوستاناي وبلىسىنىڭ قالالارى مەن ەلدى مەكەندەرىنىڭ اۋماقتارىن اباتتاندىرۋ قاعيدالارىن باسشىلىققا العان. بۇل نورمالار عيمارات يەسىنە شاتىردى قار مەن مۇزدان ۋاقتىلى تازارتۋدى جانە ازاماتتار مەن ولاردىڭ مۇلكىنىڭ قاۋىپسىزدىگىن قامتاماسىز ەتۋدى مىندەتتەيدى.
سوت جاۋاپكەردىڭ زياننىڭ الدىن الۋ ءۇشىن بارلىق قاجەتتى شارالاردى قولدانباعانى تۋرالى قورىتىندىعا كەلىپ، تالاپتى تولىق كولەمدە قاناعاتتاندىردى. جەكە كاسىپكەردەن 2 ملن تەڭگە كولەمىندە ماتەريالدىق شىعىن ءوندىرىلدى. قازىرگى ۋاقىتتا شەشىم زاڭدى كۇشىنە ەنگەن جوق.