پروكۋراتۋرا قوستانايداعى تۇرعىن ءۇيدىڭ اۋلاسىندا پوليسەيدى اياۋسىز سوققىعا جىعۋ تۋرالى قىلمىستىق ءىستى سوتقا جولدادى. ايىپتالۋشىلار ۇشەۋى دە سوت الدىنا شىعادى، دەپ حابارلايدى infohub.kz سايتى.
وقيعا 28 ناۋرىز تاڭەرتەڭ بەرەكە شاعىن اۋدانىندا بولعان. مەسسەندجەرلەردە تاراعان اقپارات بويىنشا، ءبىر توپ جاس جۇرتشىلىق ءتارتىبىن بۇزعانى ءۇشىن ەسكەرتۋ جاساعان ءتارتىپ ساقشىسىنا شابۋىل جاساعان.
پوليسەيلەر كۇدىكتىلەردىڭ بارلىعىن وقيعا ورنىنان جەدەل انىقتاپ، ۇستاعان. بيلىك وكىلىنە شابۋىل جاساۋ فاكتىسى بويىنشا قىلمىستىق ءىس قوزعالىپ، سوت ءۇش ايىپتالۋشىنى ەكى ايعا قاماۋعا الۋعا سانكسيا بەرگەن.
«الاۋ» تەلەارناسىنىڭ حابارلاۋىنشا، قوستاناي پروكۋراتۋراسى پوليسيا قىزمەتكەرىنە زورلىق-زومبىلىق كورسەتكەن ءۇش ادامعا قاتىستى قىلمىستىق ءىستى سوتقا جولداعان. سوتقا دەيىنگى تەرگەۋ ماتەريالدارىنا سايكەس، وقيعا تۇرعىن ءۇيدىڭ اۋلاسىندا بولعان.
«ءۇش ايىپتالۋشى ماساڭ كۇيدە بولىپ، قوعامدىق ءتارتىپتى بۇزعان. پوليسەي ولارعا ەسكەرتۋ جاساعان، سودان كەيىن ەر ادامدار اگرەسسيا تانىتىپ، وعان زورلىق كورسەتكەن. پوليسيا قىزمەتكەرى دەنە جاراقاتتارىن العان. ايىپتالۋشىلاردىڭ ارەكەتتەرى «ومىرىنە نەمەسە دەنساۋلىعىنا ءقاۋىپتى زورلىق-زومبىلىقتى بيلىك وكىلىنە ونىڭ قىزمەتتىك مىندەتىن اتقارۋىنا بايلانىستى قولدانۋ» بابى بويىنشا سارالانعان»، — دەلىنگەن پروكۋراتۋرا حابارلاماسىندا.
بۇل باپتىڭ سانكسياسى 10 جىلدان 15 جىلعا دەيىن باس بوستاندىعىنان ايىرۋدى كوزدەيدى. قوستاناي وبلىسى پروكۋراتۋراسى سوت پروسەسى اشىق وتەتىنىن جانە ءىس بويىنشا تۇپكىلىكتى شەشىمدى سوت قابىلدايتىنىن ناقتىلادى.