پوليسيا قىزمەتكەرلەرى بالاپاندارى بار اققۋلار وتباسىن وتكىزۋ ءۇشىن قوزعالىستى توقتاتقان بەينەجازبا الەۋمەتتىك جەلىدە جىلدام تارادى. ءتارتىپ ساقشىلارىنىڭ بۇل ارەكەتى جۇزدەگەن قولدانۋشىنى تولعاندىردى، دەپ حابارلايدى infohub.kz سايتى.
قوستاناي وبلىسى پوليسيا دەپارتامەنتىنىڭ مالىمەتىنشە، بەينەجازبانىڭ كەيىپكەرى – قوستاناي اۋدانى پاترۋلدىك پوليسيا ۆزۆودىنىڭ ينسپەكتورى، پوليسيا اعا لەيتەنانتى الي ەرۇلان. ول ارىپتەسى ايداربەك السەيتوۆپەن بىرگە قىزمەت اتقارىپ جۇرگەندە جولدىڭ قاسىنان بالاپاندارى بار اققۋدى بايقايدى. قوزعالىس قارقىندى بولعاندىقتان، قۇستار جولدان ءقاۋىپسىز وتە الماي تۇرعان. پوليسەيلەر جولدى ۋاقىتشا جاۋىپ، قۇستار وتباسىنا تىنىش وتۋگە مۇمكىندىك بەرۋدى ۇيعاردى.
الي ەرۇلاننىڭ ايتۋىنشا، بۇل وقيعا وعان تورعاي اۋىلىندا وتكەن بالالىق شاعىن ەسكە ءتۇسىرىپتى. «ارىپتەسىم ايداربەك السەيتوۆپەن بىرگە پاترۋلدەپ ءجۇرىپ، كىشكەنتاي بالاپاندارى بار اققۋلار وتباسىن كوردىم، كوز الدىما بىردەن بالالىق شاقتان ەستەلىكتەر ورالدى. ەسىمدە، بىردە ءبىزدىڭ اۋىلدىڭ ماڭىنا جىل قۇستارى – اققۋلار توبى توقتاعان ەدى. ءبىز سوندا بالا ەدىك: قۇستاردى ۇركىتپەي، كەرىسىنشە، ولارعا تىنىش جول جالعاستىرۋعا كومەكتەسۋگە تىرىساتىنبىز. بۇگىندە ءبىز ەش ويلانباستان قوزعالىستى توقتاتىپ، اققۋلارعا بالاپاندارىمەن بىرگە جولدان ءقاۋىپسىز وتۋگە مۇمكىندىك بەردىك. بىرەۋلەر ءۇشىن بۇل بىرنەشە مينۋت كۇتۋ عانا، ال ءبىز ءۇشىن – امان قالعان ءومىر جانە بۇل الەمدى ءسال دە بولسا مەيىرىمدى ەتۋ مۇمكىندىگى»، — دەپ ءبولىستى ول.
الي ەرۇلان ىشكى ىستەر ورگاندارىندا جەتى جىلدان بەرى قىزمەت ەتەدى جانە پوليسەيدىڭ ءوزى مويىنداعانداي، مۇنداي ەرەكشە جاعداي ونىڭ باسىندا ءبىرىنشى رەت بولدى.
پوليسيا قىزمەتكەرلەرىنىڭ بۇل ارەكەتى ينتەرنەتتە كەڭ رەزونانس تۋدىردى. قولدانۋشىلار پاترۋلدىكتەردىڭ جاناشىرلىعى ءۇشىن العىس ءبىلدىردى.
بۇعان دەيىن الماتىدا ءۇش جىگىت سۋعا باتىپ بارا جاتقان ءيتتى قۇتقارعان ەدى.