قوستاناي وبلىسىندا 15 جاسار بالانىڭ قازاسى جانە ونىڭ اناسىنىڭ جاراقات الۋىنا قاتىستى سوت پروسەسى باستالدى. تەرگەۋ نۇسقاسى بويىنشا، ءجاسوسپىرىم وتباسىلىق جانجال كەزىندە ايەلدى قورعاۋعا تىرىسقان، دەپ حابارلايدى infohub.kz سايتى.
ەسكە سالايىق، 25 ساۋىردە ءجىتىقارادا تۇرمىستىق جانجال بولىپ، 37 جاستاعى ايەل پىشاق جاراقاتىن العان، ال ونىڭ ۇلى وقيعا ورنىندا قايتىس بولعان. پوليسيا قىزمەتكەرلەرى ءىزىن سۋىتپاي جابىرلەنۋشىنىڭ كۇيەۋىن ۇستاعان. بەلگىلى بولعانداي، سوت الدىنا جەرگىلىكتى تۇرعىن ەۆگەني كانىلين كەلدى، ول ايەلدى ولتىرۋگە وقتالۋ جانە كامەلەتكە تولماعاندى ءولتىرۋ فاكتىلەرى بويىنشا ايىپتالۋدا.
ءىس ماتەريالدارىنا سايكەس، قايعىلى وقيعا وتباسىنىڭ پاتەرىندە بولعان. وقيعاعا دەيىن جۇبايلار تۋىسىمەن بىرگە الكوگول ىشكەن. قوناق كەتكەننەن كەيىن ەرلى-زايىپتىلار اراسىندا جانجال شىققان.
پروكۋروردىڭ مالىمدەۋىنشە، ايىپتالۋشى اس ءۇي پىشاعىن الىپ، ايەلىنىڭ ىشىنە ۇرعان. اناسىنىڭ ايقايىن ەستىپ، بولمەگە 15 جاسار ۇلى جۇگىرىپ كىرىپ، ەر ادامدى توقتاتۋعا تىرىسقان. «كانىلين الدىندا كامەلەتكە تولماعان بالا تۇرعانىن تۇسىنە وتىرىپ، وعان پىشاق جۇزىمەن ءتورت سوققى جاسادى»، — دەدى مەملەكەتتىك ايىپتاۋشى گۇلميرا كەنجەتاەۆا.
العان جاراقاتتارىنان ءجاسوسپىرىم وقيعا ورنىندا قايتىس بولدى. تەرگەۋ نۇسقاسى بويىنشا، ودان كەيىن ەر ادام ايەلىنە جاتىن بولمەدە شابۋىلداۋدى جالعاستىرعان. ونى توقتاتىپ، قارۋسىزداندىرۋعا ايەلدىڭ تۋىسى، اپايىنىڭ ايقايىنا پاتەرگە قايتىپ كەلگەن ادام قول جەتكىزگەن.
سوت-پسيحياتريالىق ساراپتاما ايىپتالۋشىنىڭ پسيحيكالىق اۋرۋى جوق ەكەنىن جانە قىلمىس كەزىندە ءوز ارەكەتتەرىن سانالى تۇردە باسقارا العانىن كورسەتتى. مەملەكەتتىك ايىپتاۋشى سوتتان ەۆگەني كانىليندى كىنالى دەپ تانىپ، وعان ورتاشا قاۋىپسىزدىكتەگى قىلمىستىق-اتقارۋ جۇيەسى مەكەمەسىندە 22 جىل باس بوستاندىعىنان ايىرۋ جازاسىن تاعايىنداۋدى سۇرادى.
جابىرلەنۋشى جانە قايتىس بولعاننىڭ تۋىستارىنىڭ وكىلى ءومىر بويى باس بوستاندىعىنان ايىرۋدى تالاپ ەتۋدە. ايىپتالۋشى كىناسىن تولىق مويىنداپ، وكىنەتىنىن ءبىلدىردى: «مەن تۋىستارىما قاتتى قايعى اكەلدىم. مەن ءبارى وسىلاي بولعانىن قالامادىم. كەشىرىڭىزدەر مەنى».
قىلمىستىق ءىس بويىنشا ۇكىم جاقىن كۇندەرى جاريالانادى دەپ جوسپارلانۋدا.