قوستانايدا سوت ساپاسىز پلاستيكالىق وپەراسياعا بايلانىستى 1،3 ملن تەڭگەدەن استام اقشا ءوندىردى. وپەراسيا ناتيجەسىندە ايەلدىڭ جوعارعى ەرنىندە تىرتىق دەفورماسياسى پايدا بولعان. بۇل تۋرالى infohub.kz سايتى حابارلايدى.
قوستاناي وبلىسى سوتتارىنىڭ رەسمي Telegram-ارناسىنىڭ مالىمەتىنشە، قوستاناي قالالىق سوتىندا ءبىر ايەلدىڭ ەكىنشى ايەلگە قاتىستى اقشانى قايتارۋ جانە مورالدىق زياندى وتەۋ تۋرالى تالاپ ارىزى قارالدى.
سوت انىقتاعانداي، 2024 جىلعى قازاندا جاۋاپكەر تالاپكەرگە حەيلوپلاستيكا (ەرىننىڭ ءپىشىنىن، كولەمىن نەمەسە كونتۋرىن وزگەرتەتىن حيرۋرگيالىق وپەراسيا) جاساعان جانە ول ءۇشىن 120 مىڭ تەڭگە العان. قاناعاتتانارلىقسىز ناتيجەگە بايلانىستى 2025 جىلعى ساۋىردە 90 مىڭ تەڭگە تۇراتىن قايتالاما وپەراسيا جاسالعان.
ۋاكىلەتتى ورگاننىڭ تەكسەرۋى بارىسىندا جاۋاپكەردىڭ «پلاستيكالىق حيرۋرگيا» ماماندىعى بويىنشا سەرتيفيكاتى جانە مەديسينالىق قىزمەتپەن اينالىسۋعا ليسەنزياسى بولماعانى انىقتالدى. ءىس بويىنشا كەشەندى سوت-مەديسينالىق ساراپتاما تاعايىندالدى. ساراپتاما قورىتىندىسى بويىنشا، تالاپكەردىڭ جوعارعى ەرنىندە وپەراسيا كەزىندە تىندەردى شامادان تىس الىپ تاستاۋ سالدارىنان تىرتىق دەفورماسياسى پايدا بولعان. جاسالعان حيرۋرگيالىق ارالاسۋلار مەن كەلتىرىلگەن زارداپتار اراسىندا تىكەلەي سەبەپ-سالدارلىق بايلانىس بار. دەنساۋلىققا كەلتىرىلگەن زيان ورتاشا اۋىرلىقتاعى دەپ باعالاندى.
سوت جاۋاپكەردىڭ قاجەتتى بەيىندىك ءبىلىمى مەن ليسەنزياسىز، سونداي-اق مەديسينالىق قۇجاتتامانى رەسىمدەمەي مەديسينالىق قىزمەت كورسەتكەنى، بۇل تالاپكەردىڭ دەنساۋلىعىنا زيان كەلتىرگەنى تۋرالى قورىتىندىعا كەلدى. سوت شەشىمىمەن تالاپ ارىز ءىشىنارا قاناعاتتاندىرىلدى. جاۋاپكەردەن وندىرىلگەن سومالار: 210 مىڭ تەڭگە — تولەنگەن وپەراسيالاردىڭ قۇنى، 700 مىڭ تەڭگە — مورالدىق زيان ءۇشىن وتەماقى، 457 مىڭ تەڭگە — سوت ساراپتاماسىن جۇرگىزۋگە جۇمسالعان شىعىستار. سوت شەشىمى زاڭدى كۇشىنە ەنگەن جوق.