قوستاناي وبلىسىنىڭ وبلىستىق توتەنشە رەزەرۆىنەن توتەنشە جاعداي رەجيمى ەنگىزىلگەن اۋداندارداعى سۋ تاسقىنىنىڭ زارداپتارىن جويۋعا 2،4 ملرد تەڭگە ءبولىندى، دەپ حابارلايدى infohub.kz سايتى.
قاراجات حالىققا كەلتىرىلگەن زالالدى وتەۋگە، ءبىرجولعى الەۋمەتتىك كومەك تولەۋگە، سونداي-اق زارداپ شەككەن ەلدى مەكەندەردەگى جول ينفراقۇرىلىمى مەن ەلەكترمەن جابدىقتاۋدى قالپىنا كەلتىرۋگە جۇمسالدى. ەڭ كوپ قاراجات ارقالىق قالاسىنا — 880 ملن تەڭگە، قوستاناي اۋدانىنا 419 ملن، امانگەلدى اۋدانىنا 351 ملن، جانگەلدى اۋدانىنا 316 ملن، ال وبلىس ورتالىعىنا 300 ملن تەڭگە ءبولىندى.
وبلىس اكىمدىگىنىڭ ءباسپاسوز قىزمەتىنىڭ حابارلاۋىنشا، قازاقستان رەسپۋبليكاسى ۇكىمەتىنىڭ توتەنشە رەزەرۆىنەن ارقالىق قالاسىندا پاتەر ساتىپ الۋعا 405 ملن تەڭگە كولەمىندەگى العاشقى ترانش ءبولىندى. بۇل قاراجاتقا 27 پاتەر ساتىپ الىندى.
ولگەن مال ءۇشىن وتەماقى 780 باسقا تولەندى. جالپى سۋ تاسقىنىنان 980-نان استام مال باسى قىرىلدى.
الەۋمەتتىك كومەك 1 736 ءوتىنىش بويىنشا 640،9 ملن تەڭگە سوماسىندا تولەندى. امانگەلدى اۋدانىندا بارلىق 317 ءوتىنىش وڭدەلدى، باسقا اۋدانداردا جۇمىس جالعاسۋدا. وتىنىشتەردى قابىلداۋ جانە تولەمدەر توقتاتىلعان جوق. قازىرگى ۋاقىتتا زارداپ شەككەن تۇرمىستىق تەحنيكا مەن جيھازدى باعالاۋ بويىنشا ەسەپتەر دايىندالۋدا، ودان كەيىن حالىققا زالالدى وتەۋ باستالادى.
ەسكە سالا كەتەيىك، سۋ تاسقىنى قوستاناي وبلىسىنا 25 ناۋرىزدا كەلگەن ەدى. الدىمەن ارقالىق ماڭىنداعى اۋىلدار سۋ استىندا قالدى، كەيىن جانگەلدى جانە امانگەلدى اۋداندارىنىڭ ەلدى مەكەندەرى زارداپ شەكتى — 28 ناۋرىزدا ول جەردە توتەنشە جاعداي رەجيمى ەنگىزىلدى. كەيىنىرەك قاراسۋ، قوستاناي اۋداندارى مەن قوستاناي قالاسىندا دا توتەنشە جاعداي جاريالاندى.
بۇعان دەيىن ەكىدىن اۋىلىندا سۋ تاسقىنىنان باسپاناسىنان ايىرىلعان 24 وتباسى ارقالىقتا العاشقى پاتەرلەرىن العان بولاتىن.