قازاقستاندا ەكى اپتالىق جەڭىلدىك كەزەڭ ەنگىزىلدى، وسى كەزەڭدە قارىز الۋشىلار ايىپپۇلسىز، تۇراقسىزدىق ايىبىنسىز جانە وزگە دە سانكسيالارسىز نەسيەدەن باس تارتا الادى، دەپ حابارلايدى infohub.kz سايتى.
ق ر قارجى نارىعىن رەتتەۋ جانە دامىتۋ اگەنتتىگى بانكتەر مەن ميكروقارجى ۇيىمدارىنىڭ (مقۇ) كليەنتتەرمەن جۇمىس ىستەۋ قاعيدالارىن وزگەرتەتىن قاۋلى قابىلدادى. قۇجات ازاماتتارعا قارجى قىزمەتىنەن باس تارتۋعا مۇمكىندىك بەرەتىن «جەڭىلدىك كەزەڭدى» ەنگىزەدى.
ەندى قازاقستاندىقتار 14 كۇن ىشىندە كەپىلسىز نەسيەدەن نەمەسە ساقتاندىرۋ ونىمىنەن ۇيىم تاراپىنان ايىپپۇلسىز، تۇراقسىزدىق ايىبىنسىز جانە باسقا دا سانكسيالارسىز باس تارتا الادى. تەك اقشانى نەمەسە ساقتاندىرۋ قامتۋىن پايدالانعان ناقتى كۇندەر عانا تولەنۋگە جاتادى.
سونىمەن قاتار، قاۋلى جارنامادا ءبىر نارسەنى ۋادە ەتىپ، ءىس جۇزىندە كليەنت قوسىمشا شىعىنداردى كوتەرۋگە نەمەسە جارنامادا ايتىلماعان شارتتاردى ورىنداۋعا ءماجبۇر بولاتىن ادال ەمەس جارناماعا تىيىم سالادى.
جاڭا ەرەجەلەر قۇجات رەسمي جاريالانعاننان كەيىن 60 كۇن وتكەن سوڭ، ياعني 2026 جىلعى 12 قازاندا كۇشىنە ەنەدى. كۇشىنە ەنگەننەن كەيىن التى اي ىشىندە ۇيىمداردىڭ قارجى ونىمدەرىنىڭ جاڭا تالاپتارعا سايكەستىگىنە جوسپاردان تىس تەكسەرۋلەر جۇرگىزىلەتىن بولادى.
ەسكە سالايىق، قازاقستاندا ونلاين-نەسيەلەر ءۇشىن «سالقىنداتۋ كەزەڭى» ءقازىردىڭ وزىندە بار: قارىز الۋشىعا اقشا بىردەن بەرىلمەيدى، شەشىم قابىلداۋعا ۋاقىت بەرىلەدى.