رەسمي ماسكەۋ ەۋروپالىق ساياساتكەرلەردىڭ رەسەي ەۋروپا ەلدەرىنە ءقاۋىپ توندىرەدى دەگەن تۇجىرىمدارىمەن مۇلدەم كەلىسپەيدى. بۇل تۋرالى رەسەي فەدەراسياسى پرەزيدەنتىنىڭ ءباسپاسوز حاتشىسى دميتري پەسكوۆ فرانسيانىڭ «ۇلتتىق بىرلەستىك» پارتياسىنىڭ وكىلدەرى مارين لە پەن مەن جوردان باردەللانىڭ جاقىندا ايتقان سوزدەرىنە قاتىستى پىكىر بىلدىرگەندە مالىمدەدى، دەپ حابارلايدى infohub.kz سايتى.
پەسكوۆتىڭ ايتۋىنشا، مۇنداي مالىمدەمەلەر قابىلدانبايدى. «رەسەي نە فرانسياعا، نە ەۋروپاداعى بىردە-بىر مەملەكەتكە ءقاۋىپ توندىرمەيدى. بۇل تۋرالى پرەزيدەنت (رف ۆلاديمير پۋتين — رەد. ەسك.) بىرنەشە رەت ايتقان»، — دەپ اتاپ ءوتتى ول.
كرەمل وكىلى وسىلايشا فرانسيانىڭ «ۇلتتىق بىرلەستىك» پارتياسىنىڭ كوشباسشىلارى مارين لە پەن مەن جوردان باردەللانىڭ رەسەي ءقاۋىپ ءتوندىرۋ ارقىلى فرانسيانىڭ ساياساتىنا ىقپال ەتۋگە تىرىسىپ جاتقانى تۋرالى مالىمدەمەسىنە جاۋاپ بەردى.
«سوندىقتان مۇنداي مالىمدەمەلەرمەن ءبىز مۇلدەم كەلىسپەيمىز، ولاردى قابىلدامايمىز»، — دەدى پەسكوۆ.
ول سونداي-اق ماسكەۋدىڭ ەۋروپالىق مەملەكەتتەرمەن اراسىندا ەلەۋلى قاقتىعىسقا سەبەپ بولاتىن ەشقانداي داۋى جوق ەكەنىن اتاپ ءوتتى. ونىڭ ايتۋىنشا، رەسەيلىك تاراپ ەشكىمگە ءقاۋىپ توندىرمەيدى جانە ەشكىمدى شانتاج جاسامايدى.
بۇعان دەيىن رەسەي پرەزيدەنتىنىڭ ءباسپاسوز حاتشىسى دميتري پەسكوۆ ۆلاديمير ءپۋتيننىڭ ۋكراينا پرەزيدەنتى ۆلاديمير زەلەنسكيمەن ماياميدە كەزدەسۋى مۇمكىن ەمەستىگىن مالىمدەگەنى حابارلانعان بولاتىن.