رەسەي فەدەراسياسى پرەزيدەنتى ۆلاديمير ءپۋتيننىڭ ءباسپاسوز حاتشىسى دميتري پەسكوۆ ماسكەۋدىڭ يادرولىق قارۋ قولدانۋى مۇمكىن دەگەن ەۋروپا مەملەكەتتەرىنىڭ الاڭداۋشىلىعىنا قاتىستى پىكىر ءبىلدىردى، دەپ حابارلايدى infohub.kz سايتى.
ريا نوۆوستي اگەنتتىگىنىڭ مالىمەتىنشە، ەۋروپا ەلدەرى رەسەيدى يادرولىق سوققى جاساۋ جوسپارىن ازىرلەپ جاتىر دەپ كۇدىكتەنەدى. كرەمل وكىلى ماسكەۋدە مۇنداي جوسپار جوق ەكەنىن راستادى.
«بۇل تاقىرىپتى اينالدىرا الىپ، دۇربەلەڭدى ەۋروپالىقتار وزدەرى تۋدىرىپ وتىر. ءبىز ولاردى ەموسياعا بەرىلمەي، جاعدايعا وبەكتيۆتى باعا بەرۋگە شاقىرامىز»، — دەدى رەسەي باسشىسىنىڭ ءباسپاسوز حاتشىسى.
تاسس اگەنتتىگىنىڭ حابارلاۋىنشا، يادرولىق قارۋدى قولدانۋ شارتتارى رەسەيدىڭ دوكترينالىق قۇجاتتارىندا ناقتى جازىلعان، ولاردا ەڭ الدىمەن اۋماقتىق تۇتاستىقتى قورعاۋ تۋرالى ايتىلادى. بۇل تۋرالى پەسكوۆ «ۆالداي» حالىقارالىق پىكىرتالاس كلۋبىنىڭ XXIII جىلدىق كەزدەسۋى اياسىندا جۋرناليستەرگە ايتتى.
بۇعان دەيىن رەسەيدىڭ يرلاندياداعى ەلشىلىگى كالينينگرادتى وقشاۋلاۋ ارەكەتى بولعان جاعدايدا ناتو ەلدەرىنە قارسى يادرولىق قارۋ قولدانۋعا دايىن ەكەنىن مالىمدەگەن. ناتو باس حاتشىسى مارك ريۋتتە اليانستىڭ رەسەي فەدەراسياسىنان ەسكەرتۋ العانىن راستادى.
وعان دەيىن رەسەي سىرتقى ىستەر ءمينيسترى سەرگەي لاۆروۆ ماسكەۋ ەۋروپاعا شابۋىل جاساۋعا نيەتتى ەمەس ەكەنىن ايتقان. سونىمەن قاتار ول رەسەيگە شابۋىل جاسالعان جاعدايدا ەۋروپالىق ەلدەرگە «قىسقا سوعىسپەن» قورقىتقان.
سونداي-اق ناتو-نىڭ رەسەيمەن سوعىس جاعدايىنا ارنالعان جوسپار دايىنداعانى بەلگىلى بولدى.