كرەمل رەسەيدىڭ يركۋتسك وبلىسىندا وبا ىندەتىنىڭ ءورشۋى مۇمكىن دەگەن حابارلامالارعا قاتىستى پىكىر ءبىلدىردى. رەسەي پرەزيدەنتىنىڭ ءباسپاسوز حاتشىسى دميتري پەسكوۆ 5 قازانداعى بريفينگتە تەك روسپوترەبنادزوردىڭ دەرەكتەرىنە سۇيەنۋگە جانە ايماقتاعى احۋالعا قاتىستى تاراعان قاۋەسەتتەرگە سەنبەۋگە شاقىردى، دەپ حابارلايدى infohub.kz سايتى.
«وسى سالادا قۇزىرەتتى باس ۆەدومستۆو — روسپوترەبنادزور. ءارتۇرلى قاۋەسەتتەر مەن اڭگىمەلەرگە قۇلاق اسپاي، ءدال سول روسپوترەبنادزوردىڭ رەسمي مالىمدەمەلەرىنە سۇيەنۋ كەرەك»، — دەدى پەسكوۆ.
وبا تۋرالى قاۋەسەت يركۋتسك عىلىمي-زەرتتەۋ وباعا قارسى ينستيتۋتىنىڭ 28 جاستاعى قىزمەتكەرى داريا شيپيلوۆا قايتىس بولعاننان كەيىن پايدا بولدى. الەۋمەتتىك جەلىلەر مەن بۇقارالىق اقپارات قۇرالدارىندا ول زەرتحانادا وبا قوزدىرعىشى سالىنعان پروبيركانى سىندىرىپ العان بولۋى مۇمكىن دەگەن نۇسقا تارادى.
روسپوترەبنادزور بۇل نۇسقانى راستاعان جوق. رەسمي دەرەكتەر بويىنشا، قىزمەتكەرگە ەتيولوگياسى انىقتالماعان پنەۆمونيا دياگنوزى قويىلعان. زەرتتەۋلەر ونىڭ كاسىبي قىزمەتىنە قاتىستى ميكروورگانيزمدەردى انىقتاعان جوق، ال ينستيتۋتتا پاتوگەندەرمەن جۇمىس كەزىندە ەشقانداي اپات تىركەلمەگەن.
قىزمەتكەر قايتىس بولعاننان كەيىن بيلىك ءبىرقاتار ەپيدەمياعا قارسى شارالار قابىلدادى. ونىمەن بايلانىستا بولعان 200-گە جۋىق ادام مەديسينالىق باقىلاۋدا. يركۋتسك وبلىسىنىڭ گۋبەرناتورى يگور كوبزەۆتىڭ ايتۋىنشا، ولاردا اسا ءقاۋىپتى ينفەكسيانىڭ بەلگىلەرى تابىلماعان.
رەسەيدەگى احۋال ءىرى شەتەلدىك باق-تىڭ نازارىن اۋداردى. وباعا قارسى ينستيتۋت قىزمەتكەرىنىڭ قايتىس بولۋى جانە ودان كەيىنگى كارانتيندىك شارالار تۋرالى Reuters، Associated Press، Financial Times، The Guardian، The Washington Post جانە باسقا دا باسىلىمدار جازدى. بۇل رەتتە شەتەلدىك ب ا ق رەسەيلىك بيلىكتىڭ «وبا» دياگنوزىن راستاماعانىن، الايدا بولعان وقيعانىڭ كوپتەگەن ءمان-جايى ءالى دە تۇسىنىكسىز ەكەنىن اتاپ وتەدى.
اقش تا بولىپ جاتقان جاعدايدى قاداعالاپ وتىر. دونالد ترامپ اكىمشىلىگىنىڭ وكىلى Axios-قا اق ءۇيدىڭ ىقتيمال ىندەت تۋرالى حابارلامالاردان حابارى بار ەكەنىن، احۋالدى باقىلاپ، ودان ءارى قابىلدانۋى مۇمكىن شارالاردى باعالاپ جاتقانىن مالىمدەدى. اقش مەملەكەتتىك حاتشىسى ماركو رۋبيو احۋال نازار اۋدارۋدى قاجەت ەتەتىنىن، ءبىراق ازىرگە الاڭداۋعا نەگىز جوق ەكەنىن ايتتى.
بۇعان دەيىن «كۋرسيۆ» وبا ىندەتىنىڭ ىقتيمال ءورشۋى تۋرالى قاۋەسەت وباعا قارسى ينستيتۋت قىزمەتكەرىنىڭ قايتىس بولۋى مەن يركۋتسك وبلىسىنداعى مەديسينالىق مەكەمەلەردەگى كارانتيننەن كەيىن پايدا بولعانىن جازعان ەدى.
سونىمەن قاتار وبا تۋرالى قاۋەسەتكە بايلانىستى دۇربەلەڭ قازاقستانعا دا جەتتى. كەشە دەزىنفورماسياعا قارسى كۇرەس ورتالىعى 21 قىركۇيەكتە الماتىداعى ماسعۇت ايقىمبايەۆ اتىنداعى اسا ءقاۋىپتى ينفەكسيالار ۇلتتىق عىلىمي ورتالىعىندا بولعان ءورتتى رەسەيدەگى وبا جاعدايى تۋرالى رەسمي راستالماعان قاۋەسەتپەن ءمانيپۋلياتيۆتى تۇردە بايلانىستىرۋ ارەكەتتەرى تۋرالى ەسكەرتتى.