قازاقستانداعى العاشقى ليسەنزيالانعان كريپتوايىرباستاۋ ورتالىعى Pax Finance ميللياردەر ۆياچەسلاۆ كيمگە تيەسىلى Alatau City Bank ءموبيلدى قوسىمشاسىمەن ينتەگراسيالانعانىن حابارلادى. وسىنىڭ ارقاسىندا بانك كليەنتتەرى Pax Finance پلاتفورماسىنداعى شوتىن بانك كارتاسى ارقىلى تىكەلەي قوسىمشادان تولتىرا الادى، دەپ حابارلايدى infohub.kz سايتى.
كومپانياداعىلاردىڭ ايتۋىنشا، پايدالانۋشىلارعا ەندى ءۇشىنشى تاراپ سايتتارىنا ءوتۋدىڭ نەمەسە دەرەكتەمەلەردى قولمەن ەنگىزۋدىڭ قاجەتى جوق. شوتتى تولتىرۋ بانك ەكوجۇيەسىنىڭ ىشىندەگى ينتەگراسيالانعان سەرۆيس ارقىلى جۇزەگە اسادى. بارلىق وپەراسيالار كليەنتتەردى سايكەستەندىرۋ جانە تەكسەرۋ راسىمدەرىن ساقتاي وتىرىپ، ليسەنزيالانعان پلاتفورما ارقىلى وتەدى.
Pax Finance باس ديرەكتورى اسلان بەىسپەكوۆ ينتەگراسيا قازاقستاندا سيفرلىق اكتيۆتەر ءۇشىن زاڭدى ينفراقۇرىلىمدى دامىتۋ ستراتەگياسىنىڭ بولىگى ەكەنىن ايتتى.
«ءبىز مەملەكەت باسشىسىنىڭ قازاقستاندى ورتالىق ازيانىڭ كريپتو-حابىنا اينالدىرۋ جونىندەگى تاپسىرماسىن جۇزەگە اسىرىپ جاتىرمىز. Alatau City Bank-پەن ينتەگراسيا – سيفرلىق اكتيۆتەرمەن جۇمىس ىستەۋ ءۇشىن بارىنشا ىڭعايلى جانە زاڭدى ينفراقۇرىلىم قۇرۋ ستراتەگيامىزدىڭ ءبىر بولىگى»، – دەدى ول.
العاشقى كەزەڭدە پايدالانۋشىلار فيات اقشانى سيفرلىق اكتيۆتەرگە جىلدام اۋدارا الادى. كەلەسى قادامدا كومپانيا ەكى باعىتتا دا وپەراسيالار ۋاقىتىن قىسقارتۋ ءۇشىن قاراجاتتى جىلدام شىعارۋدى ىسكە قوسۋدى جوسپارلاپ وتىر.
ەسكە سالايىق، شىلدە ايىنىڭ باسىندا ۇلتتىق بانك Pax Finance-كە قازاقستان تاريحىنداعى العاشقى كريپتوايىرباستاۋ ورتالىعى ليسەنزياسىن بەردى. ول كومپانياعا سيفرلىق اكتيۆتەردى رەسمي تۇردە ساتىپ الۋعا، ساتۋعا جانە ساقتاۋعا، سونداي-اق بولىمشەلەر اشۋعا جانە كريپتوماتتار ورناتۋعا مۇمكىندىك بەرەدى.
Pax Finance 2026 جىلدىڭ مامىرىندا استانادا تىركەلدى. ونىڭ قۇرىلتايشىلارى قاتارىندا – قارجىگەر ءارى Finmentor.kz Telegram-ارناسىنىڭ اۆتورى ارمان باتايەۆ، قازاقستانداعى كريپتويندۋستريانىڭ العاشقى قاتىسۋشىلارىنىڭ ءبىرى ازات بەكماعامبەتوۆ جانە كاسىپكەر ورىنگۋل ەسجانوۆا بار.
Alatau City Bankء-تى Kaspi.kz تەڭ يەسى ۆياچەسلاۆ كيم باقىلايدى. Forbes باعالاۋى بويىنشا، ونىڭ بايلىعى $7،8 ملرد قۇرايدى، بۇل ونى قازاقستانداعى ەڭ باي كاسىپكەر ەتەدى.