19 شىلدەدە كاسپي قۇبىر كونسورسيۋمىنىڭ تەڭىز تەرمينالىنداعى ۆپۋ-1 جانە ۆپۋ-3 سىرتقى ايلاق قۇرىلعىلارىندا تيەۋ جۇمىستارى كەزىندە ەكى مۇناي تانكەرى ۇشقىشسىز ۇشۋ اپپاراتتارىنىڭ شابۋىلىنا ۇشىرادى. بۇل تۋرالى infohub.kz حابارلادى.
ققك مالىمەتىنشە، شابۋىلعا «تەنگيزشەۆرويل» («شەۆرون») كومپانياسىنىڭ مۇنايىن تاسىمالداعان «ASIA» تانكەرى جانە «كاشاگان ب.ۆ.» مەن «ماتەن» («قازمۇنايگاز» ۇك اق) كومپانيالارىنىڭ مۇنايى جۇكتەلگەن «NISSOS IOS» تانكەرى ۇشىراعان. بۇل كەمەلەر تيىسىنشە ليبەريا مەن مارشالل ارالدارىنىڭ تۋى استىندا جۇزەدى، ەكيپاجدار حالىقارالىق.
شابۋىل سالدارىنان «ASIA» تانكەرىندە ءورت شىقتى. ققك-نىڭ اۆاريالىق-قۇتقارۋ كۇشتەرىنىڭ كومەگىمەن ءورتتى سوندىرۋگە قول جەتكىزىلدى. تيەۋ جۇمىستارى توقتاتىلدى.
ققك كومپانيا قىزمەتكەرلەرى، مەردىگەر ۇيىمدار مەن ەكيپاج مۇشەلەرى اراسىندا زارداپ شەككەندەر جوق ەكەنىن حابارلادى. مۇناي توگىلۋىنە جول بەرىلمەگەن، ەكيپاجدار مەديسينالىق كومەك سۇراماعان. ەكى تانكەر دە سۋ ۇستىندە قالدى، ماماندار كەلتىرىلگەن زاقىمدى باعالاپ جاتىر.
كومپانيا بولعان وقيعانى ققك-نىڭ ازاماتتىق نىساندارى مەن تەڭىز تەرمينالى اكۆاتورياسىنداعى كەمەلەرگە جاسالعان شابۋىل دەپ باعالايتىنىن مالىمدەدى. كونسورسيۋمنىڭ اقپاراتىنا سايكەس، بۇل – تەك ازاماتتىق ماقساتتاعى جانە حالىقارالىق قۇقىق قورعاۋىنداعى ققك نىساندارىنا جاسالعان تىكەلەي شابۋىلدىڭ بەسىنشى جاعدايى.
كاسپي قۇبىر كونسورسيۋمى رەسەي، اقش، قازاقستان جانە ءبىرقاتار ەۋروپالىق ەلدەردىڭ وتىن-ەنەرگەتيكا كەشەنىنىڭ ءىرى كاسىپورىندارىن بىرىكتىرەدى.
ققك قازاقستاننىڭ ءىرى كەن ورىندارى – تەڭىز، قاشاعان جانە قاراشىعاناقتان مۇناي تاسىمالىن قامتاماسىز ەتەدى. 2025 جىلى جۇيە ارقىلى شامامەن 70،5 ملن توننا مۇناي وتكىزىلدى، ونىڭ 75%-دان استامى شەتەلدىك جۇك جونەلتۋشىلەرگە تيەسىلى، ولاردىڭ ىشىندە «تەنگيزشەۆرويل» («شەۆرون»)، «ەكسونموبيل»، «قازمۇنايگاز» ۇك اق، «ەني» جانە «شەلل» بار.