قازاقستان ەنەرگەتيكا مينيسترلىگى 19 شىلدەدە كاسپي قۇبىر كونسورسيۋمىنىڭ (كقك) تەڭىز تەرمينالىندا مۇناي تيەۋ كەزىندە «ASIA» جانە «NISSOS IOS» تانكەرلەرىنە جاسالعان ۇشقىشسىز ۇشۋ اپپاراتتارىنىڭ شابۋىلىنا قاتىستى پىكىر ءبىلدىردى، دەپ حابارلايدى infohub.kz سايتى.
«بۇل كەمەلەر قازاقستاندا وندىرىلگەن مۇنايدى تيەپ جاتقان ەدى. تانكەرلەر بورتىندا حالىقارالىق ەكيپاجدار بولدى»، — دەپ راستادى ۆەدومستۆو.
شابۋىل سالدارىنان كەمەلەردە ءورت شىعىپ، ەكيپاج كۇشىمەن جەدەل ءسوندىرىلدى. زارداپ شەككەندەر جوق. ۆپۋ-1 جانە ۆپۋ-3 سىرتقى بەكىتۋ قۇرىلعىلارى زاقىمدانباعان، مۇناي توگىلۋىنە جول بەرىلمەگەن.
«قازىرگى ۋاقىتتا تەرمينالدا مۇناي تيەۋ وقيعانىڭ سالدارىن باعالاۋ اياقتالعانشا توقتاتىلدى. مۇناي تيەۋدى قايتا باستاۋ تۋرالى قوسىمشا اقپارات كەلىپ تۇسكەن سايىن بەرىلەتىن بولادى»، — دەپ قوستى مينيسترلىك.
ەنەرگەتيكا مينيسترلىگى مۇنداي شابۋىلداردى سىني ەنەرگەتيكالىق ينفراقۇرىلىمنىڭ تازا ازاماتتىق نىساندارىنا قارسى جاسالۋىن جول بەرىلمەيتىنىن اتاپ ءوتتى. «حالىقارالىق ەنەرگەتيكالىق ينفراقۇرىلىم نىساندارىنا قانداي دا ءبىر كۇش قولدانۋ جاھاندىق ەنەرگەتيكالىق قاۋىپسىزدىككە تاۋەكەل تۋعىزادى، ەنەرگەتيكالىق رەسۋرستارمەن ۇزدىكسىز حالىقارالىق ساۋدا تەتىكتەرىن بۇزادى جانە جوباعا قاتىسۋشىلاردىڭ ەكونوميكالىق مۇددەلەرىنە ەلەۋلى زيان كەلتىرەدى»، — دەپ مالىمدەدى ق ر ەم.