رەسەي مەن قازاقستان كاسپي قۇبىر كونسورسيۋمى (كتك) نىساندارىنىڭ فيزيكالىق قاۋىپسىزدىگىن قامتاماسىز ەتۋ ءۇشىن بىرلەسىپ جۇمىس ىستەپ جاتىر. بۇل تۋرالى رەسەي سىرتقى ىستەر مينيسترلىگى تمد ەلدەرى جونىندەگى ءۇشىنشى دەپارتامەنتىنىڭ ديرەكتورى الەكساندر ستەرنيك مالىمدەدى، دەپ حابارلايدى infohub.kz سايتى.
رەسەيلىك ديپلوماتتىڭ ايتۋىنشا، نوۆوروسسيسكىدەگى تەڭىز تەرمينالىن قوسا العاندا، كتك ينفراقۇرىلىمىن قورعاۋ ماسەلەسى قازاقستاندىق سەرىكتەستەرمەن كەلىسسوزدەر كۇن تارتىبىندە تۇراقتى تۇر. ول اتاپ وتكەندەي، كونسورسيۋم نىساندارىنا جاسالعان تەراكتىلەر ولاردى قاتتى الاڭداتادى.
«نوۆوروسسيسكىدەگى تەڭىز تەرمينالىن قوسا العاندا، كتك نىساندارىنىڭ فيزيكالىق قاۋىپسىزدىگىن قامتاماسىز ەتۋ ماسەلەسى كونسورسيۋم نىساندارىنا جاسالعان تەراكتىلەردەن قاتتى الاڭداعان قازاقستاندىق سەرىكتەستەرمەن تۇراقتى تالقىلانىپ وتىرادى. كتك-نىڭ باتىس اكسيونەرلەرىمەن بايلانىس ارقىلى قۇبىردىڭ جۇمىس ىستەۋىن قامتاماسىز ەتۋ ءۇشىن بىرلەسكەن شارالار قابىلداپ جاتىرمىز»، — دەپ كەلتىرەدى ونىڭ ءسوزىن ريا نوۆوستي.
ستەرنيك كاسپي قۇبىر كونسورسيۋمى جۇمىسىنداعى ىركىلىستەر الەمدىك نارىققا ەنەرگيا تاسىمالداۋشىلاردىڭ تۇراقتى جەتكىزىلىمىنە ايتارلىقتاي زيان كەلتىرەتىنىن جانە بۇكىل الەمدە وتىن باعاسىنىڭ وسۋىنە اكەلۋى مۇمكىن ەكەنىن اتاپ ءوتتى.
ديپلومات 2025 جىلدىڭ اقپانىنان باستاپ كتك نىساندارى مەن قازاقستاندىق مۇناي تاسىمالدايتىن تانكەرلەرگە ۇدايى ۇشقىشسىز ۇشاقتار سوققى بەرىپ جاتقانىن ەسكە سالدى. تەك وسى جىلى سەگىز وسىنداي شابۋىل تىركەلگەن. بارلىق جاعدايدا باتىس الۋشىلارعا ارنالعان شيكىزات تاسىمالدانعان.
«كوپتەگەن شەتەلدىك كوشباسشىلاردىڭ "ۇشقىشسىز" شابۋىلداردىڭ باقىلاۋسىز ورشۋىنە الاڭداۋشىلىق ءبىلدىرۋى زاڭدى»، — دەپ قورىتىندىلادى الەكساندر ستەرنيك.