كاسپي قۇبىر كونسورسيۋمىنىڭ (كتك) نوۆوروسسيسك ماڭىنداعى تەرمينالىنا ۇشقىشسىز ۇشۋ اپپاراتتارى مەن تەڭىز دروندارىنىڭ شابۋىلى سالدارىنان تاعى ەكى تانكەر مۇناي تيەي المادى. بۇل تەرمينال ارقىلى قازاقستاندىق مۇناي ەكسپورتىنىڭ 80 پايىزدان استامى وتەدى، دەپ حابارلايدى inbusiness.kz The Moscow Times-كە سىلتەمە جاساپ.
بەيسەنبىدە تۇندە ەكى كەمە جۇك تيەمەي تەرمينال اۋدانىنان كەتۋگە ءماجبۇر بولدى. دەرەككوزدەردىڭ ايتۋىنشا، «لۋكويل» كومپانياسىنىڭ مۇنايىن تيەۋگە ارنالعان HERA تانكەرى شابۋىل كەزىندە زاقىمدانعان. «قازمۇنايگاز» ۇلتتىق كومپانياسىنىڭ شيكىزاتىن تيەۋى ءتيىس ALATAU تانكەرى زاقىمدانباعانىمەن، ەكيپاجسىز كاتەرلەر قاۋپىنە بايلانىستى باعىتىن وزگەرتكەن.
كەمەلەردى باقىلاۋ جۇيەسى LSEG دەرەگىنشە، HERA 20 شىلدەدە بوسفوردان قارا تەڭىزگە شىققاننان كەيىن ترانسپوندەرىن وشىرگەن. كەمە بەيسەنبى تاڭەرتەڭ نوۆوروسسيسكىگە جەتۋدى جوسپارلاعان. 19 شىلدەدەن بەرى تەرمينالعا بەت العان ALATAU كەيىن ستامبۋل جاققا باعىتىن وزگەرتىپ، ورنالاسقان جەرى تۋرالى دەرەكتەردى دە بەرۋدى توقتاتقان.
بەيسەنبى تاڭەرتەڭ تاعى ەكى تانكەر — SEA AMBER جانە DELTA IOS — كتك تەرمينالىنا كىرۋدەن باس تارتىپ، تۇركيا جاعالاۋىنا بەت العان، دەپ حابارلايدى LSEG.
كتك بۇل جاعدايعا تۇسىنىكتەمە بەرمەيدى. عارىشتىق سۋرەتتەر بەيسەنبى تاڭەرتەڭ تەرمينال ماڭىندا بىردە-بىر تانكەردىڭ بولماعانىن كورسەتكەن.
بۇل سوڭعى ايداعى العاشقى وقيعا ەمەس. شىلدە ايىندا نوۆوروسسيسك ماڭىنداعى وڭتۇستىك وزەرەەۆكاداعى كتك تەڭىز تەرمينالىنا ۇشقىشسىز ۇشۋ اپپاراتتارى شابۋىل جاساپ، بەس تانكەر زارداپ شەكتى. 20 شىلدەدەگى شابۋىلداردىڭ بىرىنەن كەيىن كونسورسيۋم مۇناي تيەۋدى ۋاقىتشا توقتاتقانىن مالىمدەدى.
قازاقستان ەنەرگەتيكا مينيسترلىگى قازاقستاندىق مۇنايدىڭ الەمدىك نارىققا تۇراقتى ەكسپورتىن تەزىرەك قالپىنا كەلتىرۋ ءۇشىن شەشىم ىزدەۋ بويىنشا ۇزدىكسىز كونسۋلتاسيالار جۇرگىزىلىپ جاتقانىن حابارلادى.
كاسپي قۇبىر كونسورسيۋمى قازاقستاندىق مۇنايدىڭ نەگىزگى ەكسپورتتىق باعىتى بولىپ قالا بەرەدى. ونىڭ ينفراقۇرىلىمى ارقىلى ەلدىڭ مۇناي ەكسپورتىنىڭ 80 پايىزدان استامى، سونىڭ ىشىندە تەڭىز، قاشاعان جانە قاراشىعاناق سياقتى ءىرى كەن ورىندارىنىڭ شيكىزاتى وڭتۇستىك وزەرەەۆكاداعى تەرمينال ارقىلى تانكەرلەرگە تيەلەدى.