2026 جىلعى 21 قىركۇيەكتەن باستاپ قازاقستاندا «قازاقستان تەمىر جولى» كومپانياسى كورسەتەتىن ماگيسترالدىق تەمىرجول جەلىسى قىزمەتتەرىنىڭ جاڭا تاريفتەرى كۇشىنە ەنەدى. الداعى باعا ءوسىمى تۋرالى قازاقستاندىق جۇك تەمىرجول تاسىمالداۋشىلارىنىڭ قاۋىمداستىعى حابارلادى، دەپ جازادى infohub.kz سايتى.
قىزمەت قۇنىن قايتا قاراۋدىڭ قۇقىقتىق نەگىزى تابيعي مونوپوليالاردى رەتتەۋ كوميتەتىنىڭ 2026 جىلعى 2 قىركۇيەكتەگى بۇيرىعى بولدى. بۇل قۇجات قتج-نىڭ ماگيسترالدىق تەمىرجول جەلىسى قىزمەتتەرىنە بۇرىن بەكىتىلگەن تاريفتەرگە وزگەرىستەر ەنگىزەدى.
بەكىتىلگەن پارامەترلەرگە سايكەس، 2026–2027 جىلدارى ءوسىم 23–24%-دى قۇرايدى. ودان كەيىن تاريفتەردىڭ ءوسۋ قارقىنى بىرتىندەپ باياۋلاۋعا ءتيىس: 2028 جىلى 22%-عا، 2029 جىلى 20%-عا ۇلعايتۋ كوزدەلگەن، ال 2030 جىلعا قاراي ءوسىم 18% بولۋى ءتيىس.
سونىمەن قاتار وزگەرىستەر تاسىمالداردىڭ بارلىق ساناتىن قامتىمايدى. الەۋمەتتىك ماڭىزى بار ازىق-ت ۇلىك تاۋارلارى ءۇشىن تاريفتەردى بۇرىن بەكىتىلگەن دەڭگەيدە ساقتاۋ تۋرالى شەشىم قابىلداندى.
ماگيسترالدىق تەمىرجول جەلىسى قىزمەتتەرىنىڭ جاڭا قۇنى 21 قىركۇيەكتەن باستاپ قولدانىلا باستايدى.
ايتا كەتەيىك، قتج ءۇشىن تەمىرجول جولاۋشىلار تاسىمالى ءداستۇرلى تۇردە شىعىندى بولىپ كەلەدى. وسى سەبەپتى كومپانيا جولاۋشىلار تاسىمالىن جۇك تاسىمالىنان تۇسكەن كىرىس ەسەبىنەن كروسس-سۋبسيديالاۋعا جۇگىنەدى. ونىڭ ۇستىنە جۇك تاسىمالىنىڭ وزىندە تەك جەكەلەگەن جۇكتەردى — ەكسپورت پەن ترانزيت كەزىندە تاسىمالداۋ عانا پايدالى.