كۋبادا ميلليونداعان ادام ەلەكتر جارىعىنسىز قالدى — ەلدە كەزەكتى ءىرى اپاتتى ءۇزىلىس بولدى، دەپ حابارلايدى infohub.kz سايتى.
كۋبانىڭ ەنەرگەتيكا مينيسترلىگىنىڭ مالىمدەۋىنشە، ەلدىڭ بۇكىل ەلەكتر جەلىسى «تولىق اجىراتىلۋعا» ۇشىراپ، بۇكىل اۋماقتا جارىق ءوشتى.
جەلى وپەراتورى UNE كومپانياسىنىڭ حابارلاۋىنشا، كەشكە قاراي باسىم نىساندارعا — استانا گاۆاناداعى اۋرۋحانالار مەن سۋ سورعى ستانسيالارىنىڭ ماڭىنا — ەلەكتر قۋاتى قايتا بەرىلدى.
بۇل — كۋبادا بيىلعى كەمىندە التىنشى جارتىلاي نەمەسە تولىق ءۇزىلىس. ەلدەگى ەسكىرگەن ەلەكتر ينفراقۇرىلىمى مەن وتىننىڭ سوزىلمالى تاپشىلىعىن كوممۋنيستىك باسقارۋداعى مەملەكەتكە مۇناي جەتكىزۋگە سالىنعان اقش بلوكاداسى ودان ءارى كۇشەيتىپ وتىر.
UNE كومپانياسىنىڭ مالىمەتىنشە، ءۇزىلىس جۇما كۇنى جەرگىلىكتى ۋاقىتپەن 14:00-گە (گرينۆيچ ۋاقىتىمەن 18:00) تامان كۋبانىڭ ورتالىعىنداعى بەرىلىس اقاۋى مەن ناشار اۋا رايىنان باستالدى.
وپەراتوردىڭ ۇلتتىق جۇكتەمە ديسپەچەرلىك ديرەكتورى فەليكس ەسترادانىڭ ايتۋىنشا، ەلەكتر قۋاتىن «كەزەڭ-كەزەڭىمەن قالپىنا كەلتىرۋ» حاتتامالارى ىسكە قوسىلدى، ۇدەرىس سەنبى كۇنى دە جالعاستى.
كۋبا وتىن يمپورتىنا قاتتى تاۋەلدى، سوندىقتان اقش-تىڭ قاتاڭ سانكسيالارى مەن جىل باسىنان بەرگى مۇناي بلوكاداسى بۇرىننان بار تاپشىلىقتى ۋشىقتىردى.
ازىق-ت ۇلىك پەن دارى-دارمەك تە سيرەپ، اۋرۋحانالار قالىپتى جۇمىس ىستەۋگە قينالىپ، مەكتەپتەر مەن مەملەكەتتىك مەكەمەلەر جابىلۋعا ءماجبۇر بولدى.
«سوڭعى كەزدە بۇل ادەتكە اينالىپ بارادى»، — دەدى جۇما كۇنى گاۆانا تۇرعىنى فرەنك لورەنسو Reuters اقپارات اگەنتتىگىنە. «بۇرىن سيرەك بولاتىن — ايىنا ءبىر رەت… ءدال كەشە 24 ساعات ەلەكترسىز وتىردىق، ءبىر ساعات قانا قوسىپ، قايتا ءوشىرىپ تاستادى».
«بىرىنەن سوڭ ءبىرى كەلەدى: سۋ جوق، تاماق پىسىرەتىن گاز جوق، ەلەكتر جوق»، — دەدى 36 جاستاعى ءمۇعالىم ليديا فەرناندەس AFP اقپارات اگەنتتىگىنە. «شىنىمدى ايتسام، قالاي ەسىمىزدەن اداسپاعانىمىزعا تاڭمىن».
78 جاستاعى فرانسيسكو رودريگەس جۇما كۇنى ءۇيى 28 ساعات بويى ەلەكترسىز قالعانىن ايتىپ، «بىرنەشە كۇن» جارىق بولمايتىنىنان قورىقتى.
قايتالاناتىن ۇزىلىستەر كۋبادا سيرەك كەزدەسەتىن نارازىلىقتارعا تۇرتكى بولدى. ەلدە رۇقسات ەتىلمەگەن شەرۋلەر زاڭسىز، تىيىمدى بۇزعاندار تۇرمەگە قامالۋ قاۋپىنە ۇشىرايدى.
گاۆانا وتىن داعدارىسىن ترامپ اكىمشىلىگىنە تاڭىپ، ونىڭ بارلىق سانكسيالارىن، سونىڭ ىشىندە تامىزدا جاريالانعان جاڭا كەزەڭىن ايىپتادى. بۇل شارالار كاريب ارالى باسشىلىعىنا قارسى كەڭ اۋقىمدى قىسىم ناۋقانىنىڭ بولىگى.
كۋبانىڭ ايماقتاعى وداقتاسى ۆەنەسۋەلا بۇعان دەيىن كۇنىنە شامامەن 35 000 باررەل مۇناي جىبەرىپ، ەل قاجەتتىلىگىنىڭ جارتىسىن وتەپ كەلگەن. الايدا قاڭتاردا ۆەنەسۋەلا پرەزيدەنتى نيكولاس مادۋرونى اقش-تىڭ ۇستاۋىنان كەيىن ۆەنەسۋەلانىڭ ءوز جەتكىزىلىمدەرى توقتادى.
اقش پرەزيدەنتى دونالد ترامپ گاۆاناعا مۇناي جىبەرەتىن ەلدەرگە باج سالىعىن سالۋمەن قورقىتىپ، وسىنداي جەتكىزىلىمدەردىڭ ءبىرقاتارىن اقش تاركىلەدى.
ۆاشينگتون كۋباداعى ەنەرگەتيكالىق داعدارىستى ىشكى باسقارۋدىڭ ناشارلىعىنان دەپ ءتۇسىندىرىپ، ەلدى «ۇلتتىق قاۋىپسىزدىككە قاتەر» ءتوندىرۋشى دەپ ايىپتادى. ترامپ بيلىكتى قۇلاتۋ تۋرالى اشىق ايتىپ، بيىل ناۋرىزدا «دوستىق باسىپ الۋمەن» قورقىتتى.