جاڭا وقۋ جىلىنان باستاپ قازاقستان مەكتەپتەرىندە «قۇقىق نەگىزدەرى» ءپانى قايتا مىندەتتى بولادى. بۇل تۋرالى «Ana tili» گازەتىنە بەرگەن سۇحباتىندا وقۋ-اعارتۋ ءمينيسترى جۇلدىز سۇلەيمەنوۆا ايتتى، دەپ حابارلايدى infohub.kz سايتى.
«ءبىلىم بەرۋ باعدارلامالارىنا زاڭ مەن ءتارتىپ قۇندىلىقتارىن ەنگىزەمىز. ماسەلەنى اشىق ايتۋىمىز كەرەك: ءقازىر وقۋشىلار اراسىندا قۇقىقبۇزۋشىلىق ارەكەتتەرى كوبەيىپ كەلەدى. مۇنىڭ سەبەبىنە ۇڭىلدىك. سويتسەك سوڭعى جىلدارداعى كەيبىر رەفورمالاردىڭ سالدارى بايقالاتىنداي. مىسالى، 2022 جىلدان باستاپ جوعارى سىنىپتاردا ءبىرقاتار پاندەر تاڭداۋ پانىنە اينالعان. ونىڭ اراسىندا «قۇقىق نەگىزدەرى» دە بار. سونىڭ سالدارىنان كوپتەگەن وقۋشى بۇل ءپاندى تاڭداماعان، ياعني وقىماعان. دەمەك، ولار زاڭ الدىنداعى جاۋاپكەرشىلىكتى تولىق تۇسىنبەي ءوسىپ كەلەدى. ءبىر جىلدا ءجۇز مىڭداعان تۇلەك وقۋ بىتىرەتىنىن ەسكەرسەك، قانشاما وقۋشى قۇقىق پەن زاڭ ۇعىمىنان الشاقتاپ كەتكەنىن باعامداۋعا بولار. سوندىقتان جاڭا وقۋ جىلىنان باستاپ «قۇقىق نەگىزدەرى» ءپانىن قايتادان مىندەتتى ءپان رەتىندە ەنگىزەمىز. بۇعان قوسا، 5–7-سىنىپتاردا «كونستيتۋسيا نەگىزدەرى» ءپانى وقىتىلادى. بۇل باستاماعا ءارتۇرلى پىكىر ايتىلدى. ءبىراق ءبىزدىڭ ۇستانىمىمىز وزگەرمەيدى. بالا زاڭدى قۇرمەتتەۋدى ءسوز جۇزىندە ەمەس، ونىڭ ءمانىن ءتۇسىنۋ ارقىلى ۇيرەنۋى كەرەك. زاڭعا باعىنۋدىڭ، زاڭدى ساقتاۋدىڭ، قۇقىعىن ءبىلۋدىڭ ماڭىزىن مەكتەپتەن مەڭگەرۋى قاجەت»، — دەدى مينيستر.